Denis Itxaso Turismo diputatuak Mutrikuko hiribildu historikoa bisitatu du
Debegesa garapen agentziak gonbidatuta, Debabarrena eskualdea bisitatzen aritu dira, gaur [maiatzak 25], Denis Itxaso Gipuzkoako Foru Aldundiko Kultura, Turismo, Gazteria eta Kirol diputatua eta Maite Cruzado aldundiko Turismo zuzendaria. Zehazki, Mutriku eta Deba bisitatu dituzte. Eurekin batera izan dira Debabarreneko turismo proiektu nagusiak ezagutzen Juan Angel Balbas Debegesako zuzendari orokorra, Cristina Iturriagagoitia garapen agentziako Turismo arduraduna, Jose Angel Lizardi Mutrikuko alkatea eta Pedro Bengoetxea Debako alkatea.
Itxasok bisitan nabarmendu duenez, Debabarrena eskualdeko herriak Gipuzkoako lurraldeak bizi duen hazkunde turistikoaren estrategiaren erdigunean kokatu dira. “Donostiako turismo bulego berrian gure lurraldeko herriek eskaintzen dituzten erakargarritasunak erakutsi behar ditugu, turistentzat deskubrimendu bat izango delako bertako paisaia, hondartza eta gastronomia ezagutzea”.
Bisita Deban hasi dute, eta bertan, Euskal Kostaldeko Geoparkearen proiektuan jarri dute arreta nagusia. Ondoren, Debako pantalanean ontziratu eta flyscheko itsaslabarrak ikuskatu dituzte itsasotik. “Gipuzkoa altxorrez betea dago, Geoparkea adibidez, benetan ikusgarria da. Deba eta Mutriku bezalako kostaldeko herri xarmangarriak gordetzen ditu Geoparkeak, bisitatzea merezi duten lekuak. Turismoa lurraldearen suspertze ekonomikorako funtsezko sektorea bihurtu da”.
Mutrikun, berriz, baliabide turistiko garrantzitsuenak ezagutzeko aukera izan du diputatuak eta berarekin batera etorri den aldundiko Turismo zuzendariak. Nautilus Interpretazio Zentroan hasi dute bisita eta portuan amaitu dute, Bentalekua museoan, baina tartean, hirigune historikoa osatzen duten monumentu multzoa bertatik bertara ikusi eta haren inguruko nondik norakoak ere jakin dituzte Marta Amonarriz Mutrikuko turismo bulegoko arduradunaren eskutik.
Diputatua bisita gidatuan parte hartu duten beste ordezkariekin batera, Mutrikuko portuan
Maite Cruzado eta Denis Itxaso Mutrikuko hiribilduko altxorrak ezagutzen, bisitan parte hartu duten beste ordezkariekin batera
