Aulestiko VI. Motor irteera, zapatuan
Aulestiko eta inguruetako motor zaleek hitzordua dute zapatuan, Aulestiko VI. Motor irteera egingo baitute.
10:30ean elkartuko dira Donibane Enparantzan, handik Arabarantz abiatzeko.
Ullibarri Ganboako urtegitik pasatu, eta Añanako eskualdera ailegatuko dira. Bertan, Añanako Gatz Harana bisitatuko dute. Añanako gatza zelan egiten duten bertatik bertara ikusiko dute.
Munduko kultur, arkitektura, ingurumen, paisaia eta arkeologia multzo garrantzitsuenetakoa da, eta besteak beste, Europa Nostra, Kultur Ondarearen Europako Batasuneko saria eman zioten iaz.
Ondoren, Delikako arrailan egingo dute eguneko bigarren geldialdia, Nerbioi ibaiaren sorreraren ur-jausia ikusteko.
Arrigorriagako jatetxe batean bazkaldu ostean, arratsaldean bueltatuko dira Aulestira.
Izen ematea
Motor irteerara joateko asmoa dutenek, telefonoz izena eman behar dute: 659 132 894.
Momentuz hamabost bat pertsona daude izena emanda, eta antolatzaileak ahalik eta arinen izena emateko eskatu dute, batik bat jatetxean zenbat pertsona joango diren jakinarazteko.
