Ederrena jaialdia egingo dute Mutrikun, Josetxo 'Kaskas'-en omenez
Jaialdiak iaz hil zen Josetxo Flores Lizaso Kaskas kulturzale amorratua omentzea du helburu. Bere ibilbidean hainbat eta hainbat jarduera kulturaletan murgilduta ibili zen Flores, eta omenaldiak, hain zuzen ere, zinema, argazkigintza, antzerkia, pintura, musika, literatura, kazetaritza… eta beste hainbat kultur diziplina uztartuko ditu.
Herriko kultur taldeek eta norbanakoek Kaskasi omenaldia egitea erabaki dute. Omenaldi xumea, baina herrikoia izango dela nabarmendu dute, “berak gustuko izango zuen” eran. “Oso pertsona maitatua zen Mutrikun. Herriko kultur talde batzuk omenaldia prestatzen hasi ginen, baina berria bere inguruan zabaldu orduko, bere inguruko hainbat lagun eta ezagunek ere bat egin nahi izan dute omenaldi honekin”.
Bariku [ekainak 17] iluntzean hasiko dira Kaskasen omenez egingo diren ekintzak. 18:00ak inguruan Kaskasen gauzak deritzon erakusketa zabalduko da Zabiel kultur etxeko erakusketa aretoan, eta bertan, ekainaren 23ra bitartean, Josetxo Flores zenaren esentzia gogora ekarriko duten hainbat gauza ikusteko aukera egongo da.
Antolatzaileek aurreratu dutenez, herritarrek egindako ekarpenekin beteko dute erakusketa, eta bertan, Kaskasek ikutu zituen hainbat fazetetako gauzak ikusi ahal izango dira, besteak beste: LP zahar batzuk, berak idatziko poesiaren bat edo beste, Egin egunkarian Mutrikuri buruz idatzitako kronikak, bere hainbat argazki, berak margotutako koadroren bat edo beste…
Zinema oso gustuko zuen, eta bera izan zen Zine Forum Taldeko bultzatzaile eta sortzaileetako bat. Hala, bere omenaldiko ekimekin batera, Cinema Paradiso filma proiektatuko dute bariku gauean, Zabielen. Antolatzaileek filma ez dute halabeharrez aukeratu; filma, izan ere, omenduaren gogokoenetako bat zen. “Filma hau gauza askogatik aukeratu dugu. Bere filmarik gustokoena izateaz gain, berarekin lotura estua du filmaren tramak ere. Filmako protagonista, esaterako, zinema bateko proiektatzailea da, eta Kaskas ere Mutrikuko Ederrena zinemako proiektatzeailea izan zen”.
Barikuko ekintzen ostean, zapatuan [ekainak 18] jarraituko dute Kaskasen omenezko ekintzekin. 12:30ean, lore eskaintza egingo dute Xiri gunean, eta arratsaldean, berriz, entzunaldi musikala egongo da Gaztetxean. Flores oso musika zalea zen, eta 70eko hamarkadan esaterako, Mutriku eta inguruko herrietan jazz musika jartzen aritu zen, musika mota hori inguruetan ezagutzera emanaz. “Garai haietan egiten zen formatua berreskuratu nahi dugu. Ekitaldi polita izango dela uste dugu”.
22:30ean, aldiz, eguneko ekitaldi nagusia egingo da Zabiel Plazan: Funtziua. Herriko hainbat taldeko kideek musika, antzerkia, dantza, bertsoak… batuko dituen show antzerako bat egingo dute, ezuzteko eta guzti. “Zerbait azkarra izango da, baina elementu askorekin”.
Jaialdia amatzeko, Jam-session bat egingo dute Gaztetxean. Jazz musika jotzen duten hainbat musikari etorriko dira, eta inprobisazioa nagusi izango da taulagainean.
Egitaraua
Josetxe Flores Ederrena zinemako proiektatzea ere izan zen. Argazkia: Josetxo Flores
Josetxo Flores proiektore batekin
