Emaitza «onak» eman ditu Futbola oinarritik euskaraz programak
Bermeo Futbol Taldeak bi urte daramatza Bermeoko Udalagaz elkarlana egiten. Klubaren oinarrizko taldeetan euskara areagotzea da programaren helburuetako batBermeo Futbol Taldea Futbola oinarritik euskaraz programa lantzen ari da Bermeoko Udalagaz elkar...
Bermeo Futbol Taldeak bi urte daramatza Bermeoko Udalagaz elkarlana egiten. Klubaren oinarrizko taldeetan euskara areagotzea da programaren helburuetako bat
Bermeo Futbol Taldea Futbola oinarritik euskaraz programa lantzen ari da Bermeoko Udalagaz elkarlanean; bi urte daramatzate, eta aipatu programatik lortutako emaitzak «oso onak» izan direla nabarmendu dute arduradunek.Egindakoaren inguruan berba egiteko bildu ziren joan den astean Bermeo Futbol Taldeko entrenatzaileen koordinatzaileak, zuzendaritzako kideak, Koikili Lertxundi, Bermeoko Udaleko kirol zinegotzi Irune Ormaetxea eta Maite Alvarez udaleko euskara teknikaria.
Ormaetxeak eta Alvarezek gogorarazi dutenez, honakoak dira proiektuaren helburuak: Bermeo Futbol Taldeko oinarrizko taldeetan euskararen erabilera areagotzea, talderik gazteenetako entrenatzaileak euskaraz entrenatzeko gaitasuna jasotzea, saio teoriko eta praktiko guztiak euskaraz ematea, material guztiak euskaraz argitaratuta edukitzea, euskarari prestigioa ematea eta euskara ondo pasatzeagaz ere elkartzea.
Azken denboraldian entrenatzaileek egindako lan «bikaina» nabarmendu gura izan dute, «14 taldetan euskaraz egin baitituzte kalitatezko entrenamenduak». Hala, emaitza «onak» izaten ari direla ondorioztatu dute.
Bestalde, Bermeoko Udala guraso talde bategaz ere lanean egon dela azaldu dute, Elhuyar aholkularitzaren laguntzagaz: «Egindako lanari esker, gurasoen artean euskara gehiago erabiltzeko, aurrerantzean nondik nora jo behar duten zehaztu dute».
Irailean berriro batzartuko direla azaldu dute, 2016-2017 denboraldirako helburuak aurkezteko eta zehazteko.
Futbol taldea euskararen erabilera areagotzeko egiten ari den lana «eredugarria» dela azaldu dute batzarrean parte hartu duten eragileek.
