Mutrikuko Udalak abian ipini ditu uda denboraldiko zerbitzu bereziak
Mutrikuko eta Saturrarango hondartzetan TAO zerbitzua egongo da indarrean, irailaren 15a bitartean. Txakurrak ezingo dira sartu bainatzeko eremu inguruetanUdako denboraldiaren hasierarekin batera, irailaren 15a bitartean, hainbat zerbitzu berezi ipini ...
Mutrikuko eta Saturrarango hondartzetan TAO zerbitzua egongo da indarrean, irailaren 15a bitartean. Txakurrak ezingo dira sartu bainatzeko eremu inguruetan
Udako denboraldiaren hasierarekin batera, irailaren 15a bitartean, hainbat zerbitzu berezi ipini ditu martxan Mutrikuko Udalak.Abian ipini diren neurrien artean, Mutrikuko hondartzara eta Saturraranera autoz hurbiltzen direnek TAO zerbitzua izango dute. Hondartza inguruko eremuan aparkatzen duten kanpotarrek ordaindu egin beharko dute, eta ibilgailuaren zerga herrian ordaintzen dutenek, aldiz, gune horietan doan aparkatu ahal izango dute, udalak bideratutako itsasgarria autoko kristalean ipinita.
TAO zerbitzuarekin batera, Ondarbeltzen izan ezik, sorospen zerbitzua ere martxan egongo da, 11:00etatik 19:00etara, hondartzetako erabiltzaileak artatzeko.
Udalak gaineratu duenez, hainbat konponketa egin dira Saturrarango hondartzan. Hala nola, hondartzako komunak konpondu dituzte, haur parkea aldatu eta kantinan ere berrikuntzak egin dituzte. Era berean, zazpi hondartzetara joateko barandak berritu eta dunak berreskuratzeko landaketak egin dira hondartzako eremu handi batean.
Ordenantza berria
Udalak jakitera eman duenez, uda denboraldian guztiz debekatuta egongo da txakurrak hondartzetan, igerilekuetan eta igerileku ondoko arranpan sartzea. «Kexa mordoa eta sinadura bilketak ere jaso ditugu, hondartzetan txakurrak sartzen ez uzteko eskatuz. Horregatik, aurten udal ordenantza aldatu dugu. Txakurrak lotuta ibili beharko dira portu inguruan, bai eta dike berriaren inguruetan ere, debekatuetako eremuetara sartu gabe».
