Itsasotik ere badator festa
Herriko jai nagusiak ospatzeko prest daude Mundakan, San Pedro jaiak; uztailaren 3ra bitartean ume, gazte zein nagusientzako jarduerak prestatu dituzte.San Joan jaietako sugarrak itzaltzera datoz sanpedroak Mundakara. Herriko jai nagusiak ospatzeko pre...
Herriko jai nagusiak ospatzeko prest daude Mundakan, San Pedro jaiak; uztailaren 3ra bitartean ume, gazte zein nagusientzako jarduerak prestatu dituzte.
San Joan jaietako sugarrak itzaltzera datoz sanpedroak Mundakara. Herriko jai nagusiak ospatzeko prest daude mundakarrak. Arrantzaleen patroi nagusiaren eguna datorren eguaztena bada ere, San Joan egunagaz batera hasiko dituzte jaiak.Mundakako Jai Batzordeak adin eta gustu guztietarako egitaraua prestatu du, eta uztailaren 3an jaiak amaitu arte, mundakarrek ez dute aspertzeko astirik edukiko.
Txilipitxeruek izango dira gaurko protagonistak. Karroagaz ibiliko dira herritik, herri bazkaria eta jolasak antolatu dituzte, eta Basaranetik behera kuadrillen jaitsiera egingo dute.
Bi asteburu luze izango dituzte mundakarrek ondo pasatzeko, nahiz eta astegunetarako gauzak ere antolatu dituzten; kontzertuak, mendi ibilbideak, kirol ezberdinak, txistulariak, dantzak, umeentzako jarduerak, buruhandi berriztuen aurkezpena eta kalejirak… edukiko dituzte aukeran. Uztailaren 2rako antolatu dute, berriz, ohikoa duten sukalki txapelketa.
Barinaga eta Berriatua
Mundakarrak ez dira San Pedro jaiak ospatuko dituzten bakarrak. Markina-Xemeingo Barinaga auzoan, Berriatuan eta Elantxoben ere asteburuan hasiko dituzte ospakizunak.
Zapatu iluntzean martxan hasiko dira Barinagako sanpedroak, eta zapatuan auzokoen arteko herri jolasak, bildots bazkaria eta idi probak izango dituzte aukeran.
Berriatuan, bertsozaleen eguna dute gaurkoa. Bihar, berriz, entsalada eguna edukiko dute. Entsalada eta tortilla lehiaketaz gain, herri bazkariagaz, giza probekin eta arku tiro txapelketagaz ondo pasatzeko aukera izango dute bertaratutakoek.
