Antxon Alberdik eta Ekhik jantzi dute Markina-Xemeingo Xistera txapela
Xistera zirkuituko hirugarren txapelketaren irabazleak zapatuan [uztailak 9] Markina-Xemeingo Uni frontoian jokatu ziren finaletan argitu ziren. Nagusi mailan, esaterako, Antxon Alberdi berriatuarrak eta Gasteizko Ekhik 30-20 irabazi zioten Donostiako Narbarte eta Guetharyko Julien puntistei.
Berriatuarrak Tambourideguy-ren azken orduko bajaren ostean jokatu zuen finala, eta modu horretara, Xistera zirkuituko bigarren txapela lortu ahal izan du.
Norgehiagokari dagokionez, oso orekatua hasi zen, baina lehen hamar puntuen ostean, Antxonek eta Ekhik markagailuan aurrea hartu, eta horri eustea lortu zuten partida bukaera arte.
Gazte mailan ostera, Mutrikuko Ekaitz Mendizabal Goixerri-k eta The Labordek jantzi zuten txapela, Bidondo eta Mikel Manzisidor mutrikuarrari 25-14 irabazita.
Gazteek ere oso orekatuta hasi zuten partida. Nahiz eta tanteoa oso zabala izan, Goixerrik eta Labordek ezin izan zuten erdialdera arte partida bideratu. Hortik aurrera ondo asmatu zuten irabazleek eta hamar tantoko abantaila hartuta, horri eustea lortu zuten bukaera arte.
Azkenik, Mutrikuko Danok Bateko Jane Arreitunandiak eta Berriatuako Nahia Calvok irabazi zuten nesken arteko norgehiagoka, Maite Ortiz de Mendibil eta Eneritz Lizardi mutrikuarrari 15-9 irabazita.
Lehia nahikoa orekatua hasi zen, baina irabazleek euren jokoa egiteko aukera izan zuten aurkariak erraz mendean hartuz.
Alberdi eta Ekhi, txapelekin. Argazkia: Xistera
Markina-Xemeingo finalean parte hartu zuten finalistak, Uni frontoian. Argazkia: Xistera
