Goi-goitik ospatu dituzte Karmenak Ondarroan
Karmen jaien harira, azken hiru egunotan hainbat ekimen egin dituzte Ondarroan. Barikuan [uztailak 8] hasi zituzten jaiak, eta atzo [uztailak 10] bitartean, Galiziako folkloreagaz zipriztintzeko aukera izan dute Itsasaurre plazara hurreratu diren ondarrutarrek.
Egunero musika kontzertuak egon dira; eguerdietan bermut saioak egin dira eguerdiak alaitzeko, eta gauetan, ostera, orkestrek dantzan ipini dituzte plazan batutakoak. Ohi modura, Galiziako jaki tipikoak ere probatzeko aukera egon da Itsasaurren propio ipinitako txosnetan, eta horien artean arrakastarik handiena olagarroak eduki du.
Zapatuan [uztailak 9] eta domekan [uztailak 10], gainera, Bizkaiko Galizia Etxeetako kideen gaita doinuek alaitu dituzte kaleak. Zapatuan, esaterako, herriko hainbat tokitatik aldi berean irten zuten gaiteroen eta dantzarien taldeek, eta gero, saio berezia eskaini zuten Itsasaurren.
Itsasoan hildako eta galdutako arrantzaleak gogoratzeko egin zen prozesioa ere egin zuten atzo. Meza nagusia eta gero, hainbat kirol ontzietan itsasoratu ziren, eta lore eskaintza egin zieten badiako uretan, gaiteroen laguntza eta guzti.
Karmen jaiak datorren urtera arte agurtu badituzte ere, hilaren 23tik 25era beste hainbat ekintza egingo dituztela aurreratu dute Ondarroako Galizia Etxekoek. Hiru egunez, galiziarren santuaren omenezko Santigo jaiak ospatuko dituzte.
Gaiteroak, Ondarroako Karmen jaietan
