Ondarroak bigarren eta Isuntzak bosgarren amaitu dute Donostian
Zapatuan [uztailak 9] KAE1 Ligako bosgarren jardunaldiko IX. Donostiarra-Kaiarriba estropada jokatu zen Donostiako Kontxako badian. Ondarroako eta Isuntzako traineruek lan ona egin zuten, eta bigarren eta bosgarren amaitu zuten, hurrenez hurren.
Ondarroak, esate baterako, hirugarren txandan jokatu zuen estropada, Getaria, Pedreña eta Donostiarragaz batera. Getaria hasiera-hasieratik buruan joan zen, eta ondarrutarrak aldea murrizten saiatu baziren ere, ezin izan zioten Getariako traineruari aurrea hartu. Getariak lortu zuen bandera 20:46,73 denboragaz, eta ia bost segundora sailkatu zen Ondarroa (20:51,57).
Lekeitioko traineruak, ostera, bigarren txandan jokatu zuen estropada Deusto-Bilbao, Hondarribia eta Orioko trainuen aurka, eta hiru ziabogak eta lau luzeak bere txandako lehen postuan amaitu bazituen ere, hirugarren txandako lau traineruek baino denbora gehiago behar izan zituen. Hala, bosgarren sailkatu zen 20:55,65 denboragaz.
Ligako sailkapen orokorrari dagokionez, Ondarroak lidertzari eusten jarraitzen du, 58 puntugaz. Bigarren eta hirugarren, ostera, Getaria eta Donostiarra daude, hurrenez hurren, 47 puntugaz. Isuntza seigarren postuan da, 42 puntugaz.
