Garagardo Fest ospatuko dute zapatuan, Uhagon Kulturgunean
Iaz moduan, aurten ere askotariko garagardo motak dastatzeko aukera izango dute bertaratzen direnek.
Uhagon kulturguneko kideek jakitera eman dutenez, eguraldi onagaz kanpoan egingo dute jaialdia, euria bada ostera, barruan elkartuko dira.
“Nahi duena etorri ahal da. Garagardo motak dastatzeagaz batera, horien informazioa ere emango dugu”, zehaztu dute antolatzaileek.
19:00etan hasiko da jaialdia, eta ordu bete beranduago Aterri taldearen kontzertua egongo da.
Eibar eta Elgoibarko kideekaz osaturiko laukotearen errepertorioa kantu ezagunen bertsioekin eta abesti propioekin osatzen da, sustrai afroamerikarrak dituzten doinuei lehentasuna emanez.
Garagardoak eta pintxoak. Zortzi bat garagardo mota probatzeko aukera eskainiko dute: “Bakoitzak prezio jakin bat izango du”.
Halaber, garagardo dastaketa laguntzeko pintxoak egingo dituztela jakitera eman dute. Hain zuzen ere, pintxoak 0,50 eurotan ipiniko dituzte.
