Astelehenean hasiko da Gripearen kontrako txertaketa kanpaina
Abenduaren 17a arte egingo du Osakidetzak Gripearen kontrako txertaketa kanpaina, Gripea ez dezazula lagun izan lemapean. 65 urtetik gorakoei, gaixotasun kronikoren bat dutenei, haurdun dauden emakumeei, eta osasun-arloko langileei zuzenduta dago.
Osakidetzak 380.000 txerto eskuratu ditu, eta, behar izanez gero, gehiago eskuratuko dituela jakitera eman dute. Aurtengo kanpaina astelehenean [urriak 10] aurkeztu zuten, Donostian.
Gripearengandik babesteko neurriak: eskuak sarri garbitzea, erabili edota botatzeko mukizapiak erabiltzea, eta eztula edo doministiku egitean ahoa estaltzea1.200.000 euroko inbertsioa egin du erakunde publikoak, eta txertaketa tasan %35era heltzea du helburu. Jon Darpon Osasun sailburuak astelehenean kanpainaren aurkezpenean adierazi zuenez, gripea osasun publikoaren arloko “arazo nagusienetako” bat da, eta urtero errepikatzen da: “Bizi-itxaropen handiena duen gizarteetako bat da gurea, eta Osasun Sailaren eta Osakidetzaren betebeharra da gripeak arrisku-taldeei konplikaziorik ez eragiteko behar diren erremintak erabiltzea. Txertoa, beraz, gripeari aurre egiteko armarik eraginkorrena da”. Horregatik, txertoa urtero hartzearen garrantzia nabarmendu zuen. Bestalde, gripearengandik babesteko beharrezko diren higiene-neurriak gogora ekarri zituen: eskuak sarri garbitzea, erabili edota botatzeko mukizapiak erabiltzea, eta eztula edo doministiku egitean ahoa estaltzea. Kanpainari buruzko informazioa herritar denengana heltzeko zenbait ekimen burutuko dituzte. Besteak beste, informazioa postaz eta telefonoz helaraziko dute, Beti On adineko pertsonen arreta-sistemaren bitartez. Era berean, Osasun Aholkua indartuko dute, txertaketa bizkortu eta errazteko. Iazko datuak. Iaz 367.000 dosi baino gehiago jarri zituzten, eta horietatik sei pertsonak baino ez zuten izan kontrako erreakzioa (larririk bat ere ez). Bestalde, 2015-2016 ekitaldian, konplikazioak izan zituzten eta arrisku-faktoreak zituzten 174 pertsonetatik % 63 gripearen aurkako txertoa hartu gabe zeudela azaldu dute. Haietariko % 38 zainketa intentsiboetako unitatean sartu behar izan zituzten.
