Ondarroako portuan sardina eta txitxarro asko lehorreratu dituzte egunotan
Ondarroako Kalare Deuna kofradiako ordezkariek nabarmendu dutenez, baxurako ontziek sardina eta txitxarro baltz asko lehorreratu dituzte egunotan. Gaineratu dutenez, denboraldiko lehen sardina aleak izan dira egunotan Egidazu Kaian deskargatu direnak.
Denboraldiko lehen sardina aleak, hain zuzen ere, martitzenean [urriak 11] porturatu zituzten; guztira, 132.000 kilo. Prezioari dagokionez, bataz beste, 70 zentimoan saldu zen kiloa.
Gaur [urriak 13], ostera, eguerditik aurrera sardina gehiago porturatzea aurreikusten da. Goizeko aurreikuspenen arabera, 3.350 kaxa lehorreratuko dituzte hurrengo orduetan, 26.800 kilo inguru. Eguerdiko kopuruaz gain, goizean ere saldu da sardina partida bat. Kiloa 1,70-1,20 euro bueltan saldu da.
Sardinagaz gain, txitxarro baltz asko harrapatu dute baxurako arrantzaleek egunotan. Martitzenean, esate baterako, 2.500 kilo saldu dira kofradian. Merke saldu zen arraina, kiloa, bataz beste, 33 zentimoan.
Atzo [urriak 12] eta gaur [urriak 13] ere txitxarro baltz asko porturatu dute, nahikoa tamaina handikoa gainera (kiloan 5-6 ale). Ontzi bakoitzak 10 eta 12 tona inguru deskargatu ditu azken bi egunotan.
Hegalaburretan. Hegaluzearen kostera itxi ostean, bestalde, hegalaburretan jarraitzen dute sei bat ontzik; Getariako hiruk, Hondarribiako bik eta Lekeitioko Ondarzabal-ek. Astelehenean, esate baterako, 14 tona hegalabur saldu ziren bentan. Kiloa, bataz beste, 6,17 euroan saldu zen.
Atzo [urriak 12] eguraldi eskasa egon zenez, itsasontziak portuan lotuta egon ziren. Hegalaburretara joan diren ontziak gaur itsasoratu dira.
‘Nuestro padre Tonino’ ontziko arrantzaleak txitxarro baltza deskargatzen, gaur goizean
