739 mendizalek parte hartu dute Aulestiko XI. Ermitarik ermita mendi martxan
Antolatzaileek nabarmendu dutenez, parte hartze maila altua mantendu da aurten ere. Parte hartzaileek Aulesti inguratzen duten paraje ederretatik ibiltzeko aukera paregabea eduki duteEguraldi ona lagun, jende askok egin zuen zapatuan Aulestiko XI. Ermi...
Antolatzaileek nabarmendu dutenez, parte hartze maila altua mantendu da aurten ere. Parte hartzaileek Aulesti inguratzen duten paraje ederretatik ibiltzeko aukera paregabea eduki dute
Eguraldi ona lagun, jende askok egin zuen zapatuan Aulestiko XI. Ermitarik ermita mendi martxa. Antolatzaileek jakitera eman dutenez, parte hartze maila altua egon da aurten ere; 739 lagunek egin dute martxa. «Oso gustura eta pozik gaude. Denbora ederra egin du, eta antolaketa aldetik lan handia egin ondoren, asebeteta geratu gara».Parte hartzaile gehienak eskualdekoak izan baziren ere, urrutiagotik etorritakoek ere parte hartu zuten martxan. «Busturialdetik ere nahikoa jende etorri da, eta baita Gipuzkoatik ere; Eibar edo Elgoibar moduko herrietatik».
Parte hartzaileek aukeran izan zituzten hiru ibilbideetan Aulesti inguratzen duten paraje ederretatik ibiltzeko aukera paregabea izan zuten, eta irteten lehenak ibilbide luzean zein bere- zian parte hartu zutenak izan ziren. 08:00etan irten zuten herriko plazatik.
Gehienek 25 kilometroko ibilbidean parte hartu zuten, eta egin zutenek San Anton, Goierri, Urregarai, Malats, Zubero, Urriola, Murelaga, Garatxaga, Lekerika eta Narea auzoetatik barrena ibili ziren.
Errepikatzeko asmoa
Mendi martxetan ibiltzera ohituagoak daudenek, berriz, 31 kilometroko ibilbide berezia egin zuten, Ilunzarreraino. 31 kilometroko ibilbide berezia, hain zuzen ere, aurten egin da estreinako, eta bertan nahikoa jendek parte hartu duela ikusita, datorren urtean ere esperientzia errepikatzea erabaki dute antolatzaileek. «Ibilbide gogorra da, eta bertan parte hartu dutenak oso ondo prestaturiko mendizaleak izan dira. Denak ere oso pozik ikusi ditugu».
10 kilometroko ibilbide laburrean parte hartu zutenek, ostera, 10:30ean irten zuten parketik. Gehienak gazteak eta umedun familiak izan ziren, eta horiek, Murelaga, Garatxaga, Lekerika eta Narea auzoetatik ibili ziren.
Hiru ibilbideetan parte hartu zuten gehienek 13:30-14:00ak bueltan amaitu zituzten martxak, eta guztiak plazan elkartu ziren, giro ezin hobean. Eztarriak busti eta urdailak asetzeko aukera eduki zuten kopauan.
