Ekintzaileentzako tailerrak egingo dira Mutrikun
Mutrikuko Udal Garapen Sailak eta Debegesa Debabarreneko Garapen Ekonomikorako Elkarteak antolatuta, ekintzaileentzako tailerrak egingo dira datozen asteotan Mutrikun.
Antolatzaileek adierazi dutenez, ekintzaileek enpresa propioa sortu edo ideiaren bat garatzeko “aukera aproposa” izango dute bertan burutuko diren bi tailerretan. “Ideiak garatu, eta aukera berriak atzeman ahal izateko ekintzaile tailerrak ipini ditugu eskura”. Gaineratu dutenez, ekintzaileen bidea “erraztu” nahi dute tailerren bidez.
Tailer bakoitzak bi asteko iraupena izango du, eta ekintzaileak astean hirutan bilduko dira, 09:30etik 13:30etara, Konde kaleko ekintzaile berrientzako bulegoan.
Egingo diren tailerretan lehena Mutriku ekinean deritzona izango da. “Herriko ekintzaileek dituzten ideiak errealitatera hurbiltzeko aukera izango dute, eta horiek gauzatzeko zer pauso eman behar diren ikasiko dute”. Bertan hainbat alderdi landuko dira; sormena edo elkarlana, esaterako. Tailerrari dagokionez, honako egunetan izango da: urriak 24, 26 eta 28 eta azaroak 2, 4 eta 7.
Zure proiektua abian jarri tailerrean, aldiz, ideia zehatz edo nahikoa argia dituztenei lagunduko diete. “Askotan ideia onak edukitzen dira, baina ez dute jakiten zer pauso eman behar diren negozio bat martxan jartzeko. Bertan kontuan eduki behar dituzten gaiak erakutsiko diete, besteak beste”. Honakoak izango dira tailerra burutuko diren egunak: azaroak 14, 16, 18, 21, 23 eta 25.
Antolatzaileek gogorarazi dutenez, tailerrak doakoak izango dira. Bertan parte hartu nahi dutenek Mutrikuko turismo bulegoan eman beharko dute izena. Bertaratu ezin dutenek 943-60 33 78 telefonora deituta edo turismo@mutriku.net posta elektronikora idatzita eman dezakete izena.
Hainbat ekintzaile Mutriku Ekinean tailerrean parte hartzen. Argazkia: Alberto Gorritiberea
