Gaixorik dauden presoek bizi duten egoera "erdigunean" jartzea lortu dela dio Sarek
Aurreko zapatuan [urriak 15] Donostian egindako manifestazioagaz oso gustura geratu dela adierazi du Sare herritarrak, eta “ideologiak alde batera utzita”, gaitz larriak dituzten euskal presoen askatasun eskaera nabarmendu nahi izan zuten milaka pertsonei eskerrak eman nahi izan diete Sareko ordezkariek. “Arrakasta, jendetsua, ozena… izan dira, Donostia erdialdeko kaleak bete zituen pasa den zapatuko manifestazioaren berri emateko komunikabideek erababili dituzten adjektiboetako batzuk. Salatzen dut dinamika aurkeztu genuenean, entzun eta sentituko gaituzue esan genuen. Eta gure ustez, hori lortu genuen zapatuan”.
Sarek nabarmendu duenez, milaka eta milaka herritarrek emandako tamainako erantzunari esker, gaixorik dauden hamar euskal presoen eskubide urraketa, eta, oro har, kolektibo guzti horrek bizi duena, erdigunean jartzea lortu dira, Sarek bilatzen zuen modura. “Uste dugu lehen helburua, aktibazio ziklo berri bat irekitzearena, lortu dugula. Baina oraindik, bide luzea da egiteko geratzen dena”.
Gaineratu dutenez, gaitz larriak dituzten presoen askatasuna lortu arte beharrean jarraituko dute. Helburu horrekin gainera, Bagoazek deituta azaroaren 19an Baionan egingo den manifestazioan parte hartzera dei egin dute.
Datu kezkagarriak. Zapatuko manifestazioaren inguruko balorazio positiboa egin baldin badute ere, euskal presoen gehiengoak sakabanatuta jarraitzen duela gogorarazi dute.
Are gehiago, kopurak azken bost urteotan gora egin duela nabarmendu dute. Sarek eman dituen datuen arabera, duela bost urte, 665 euskal presotatik %98,8a sakabanatuta zuenden, eta zortzi (%1,2) bakarrik zeuden Euskal Herrian. Gaur egun, 360 euskal presotatik %99,17 sakabanatuta daude, eta horietatik hiru (%0,83) bakarrik daude Euskal Herrian. “Presoen kopuruan dagoen ezberdintasuna ez du Estatuaren eskuzabaltasunak eragin, zigorrak osorik bete izanak baizik”.
Sakabanaketaz gain, espetxeetan beste urraketak batzuk ere ematen direla azpimarratu dute, eta horiei amaiera emateko asmoz, erakundeak eta alderdi politikoak gutxiengo batzuk adostera gonbidatu dituzte. “Bide orri bat parteka dezatela, ezbairik gabe, euskal jendarteak partekatu eta bere egingo duena”.
Preso gaixoak etxeratzeko eskatzeko manifestazioa, Donostian. Argazkia: Sare
