Markina-Xemeingo Patxua Tabernak jaso du Ispasterko 31. Zaldi Mando Proben sari nagusia
75 untze, 3/4 eta 6,07 metroko markarekin nagusitu da, eta txapela eta mantagaz batera 750 eurorekin saritu dute. Maider Uriarte aulestiarra sailkatu da bigarren, 75 untza eginda, eta haren atzetik Mungiako Bar Goietaseko ordezkaria sailkatu da, 74 untza eta 5,45 metrogaz.
Lea Artibai eskualdeko partaideentzat ere sariak egon direnez, Markinako Patxua tabernaren izenean parte hartu duen zaldiak eraman du 120 euroko lehen saria.
Aulestiko Maider Uriarteren zaldiarentzat izan da bigarren saria eta hirugarren saria Aulestiko Kobaren zaldiarentzat izan da.
Barikutik domekara [urriak 14tik 16ra] lehiatu zituzten Ispasterko 31. Zaldi Mando Probak. Lehenengo egunean leia bizia egon zen, eta bertan ezarri zuten marka: “Beste inork ezin izan du hobetu, ezta urreratu ere”, zehaztu dute.
Aurtengo demen balorazio positiboa egin du Ispasterko udalak: “Probak oso ondo joan dira. Hiru egunetan jende ugari egon da; barikua izan da egun jendetsuena”.
Sailkapena:
Patxua tabernako ordezkaria, Ispasterko udal ordezkarien eskutik manta jasotzen. Argazkia: Ispasterko Udala.
- Patxua taberna (Markina-Xemein): 75 untza 3/4 6,07m (Pisua: 565kg)
- Maider Uriarte (Aulesti): 75 untza (Pisua: 573kg)
- Bar Goieta (Mungia): 74 untza 5,45m (Pisua: 522kg)
- Taberna Goieta (Mungia): 70 untza 3/4 0,47m (Pisua: 570kg)
- Koba (Aulesti): 69 untza 2,30m (Pisua: 555kg)
- Jose Luis Idoeta (Aulesti): 66 untza (Pisua:556kg)
- Etxeberri (Itziar): 62 untza 3/4 6,85m (Pisua: 550kg)
- Errotatxu (Urduliz): 62 untza 1/4 1,10m (Pisua: 627kg)
- Goitia (Berango): 61 untza 5,00m (Pisua:593kg)
- Lopez (Laudio): 54 untza (Pisua: 612kg)
