Ikerbiltza proiektua martxan da Lea-Artibain
Ikerbiltza programa Udalbiltzaren gaur egungo lan ildoetako bat da, eta hezkuntza munduan sortzen den ezagutza herritarren eta jendartearen garapenari begira jartzea dauka helburu.
Orain arte, nazio mailan aritu da Udalbiltza proiektua lantzen, eta orain Lea-Artibaira egokituriko programa eta egitasmoa landuko dute (eskualde mailan halako esperientzia egiten duten lehen aldia da). Tokiko jakintza tokiko garapenera bideratzeko asmoagaz eskualdeko zenbait udalerriek bat egin dute proiektuagaz.
Ikasketak burutzen edota amaitu berri dituzten herritarrek bertoko garapenerako lagungarri diren proiektuak bultzatzea eta aurrera eramatea da Ikerbiltzaren asmoa. “Gure eskualdea beste batzuekin alderatuta txikia denez horretarako aukera ematen du. Herria kohesionatzeko langintzan hastea da gure asmoa. Alde batetik, Euskal Herri mailako ikuspegiagaz kohesioa lantzea, eta beste alde batetik, gauza praktikoetan udalek ditugun beharrizanak asetzea”, azaldu du Arkaitz Goikoetxea Munitibarko alkateak.
Lehen pausoa eman dute dagoeneko: Munitibarko Udalean eta Bengola Natur Energia Interpretazio zentroan hasi dira egitasmoa garatzen.
Bengolan Eibarko EHUren Ingeniaritza eskolagaz, energia berriztagarrien arloa lantzen dabiltza. “Zentroa autosufizientea izateko zer egin genezakeen aztertzen ari dira, eta bestalde, udaletxean dauden beharrizan praktikoei zelan heldu aztertzen ari gara”, zehaztu du Munitibarko alkateak.
Eragileekin bilerak. Egitasmoa azaldu eta elkarlana sustatzeko asmoagaz, azaroan zehar eskualdeko agente ekonomiko desberdinekin batzartuko dira. Esate baterako, Lea-Artibaiko Garapen Agentziako, Lea Ibarra Udal Mankomunazgoko, Lea-Artibai Amankomunazgoko eta Lea Artibai Ikastetxeko ordezkariekin batuko dira.
Ezkerretik eskumara: Arkaitz Goikoetxea Munitibarko alkatea, Jon Arriola Berriatuako alkatea, Luis Intxauspe Udalbiltzako lehendakaria, Juanjo Txurruka Markina-Xemeingo alkatea, Karmelo Ibarluzea Etxebarriko zinegotzia, Edriga Aranburu Lekeitioko zinegotzia eta Zunbeltz Bedialauneta Ondarroako alkatea, eguerdian proiektua aurkezteko egin duten agerraldian.
Urtero milaka ikasle pasatzen dira hezkuntza zentroetatik, eta horien proiektuak lurraldearen garaipenerako aprobetxatzearen beharra ikusten duteHalaber, eskualdeko herritar, ikasle, irakasle, aditu eta eragile guztiei Lea-Artibain martxan jarri duten egitasmo berri honekin bat egiteko deia luzatu diete. Horretarako, interesa dutenek helbide elektronikora mezua idatzi dezakete: ikerbiltza@udalbiltza.eus. Bestalde, telefono zenbaki honetara deitu ahal dute: 699 048 428. Kohesioa eta garapena. Luis Intxauspe Udalbiltzako lehendakariak azaldu duenez, Udalbiltzaren helburu nagusia Euskal Herriko lurralde desberdinen kohesioa eta garapena lantzea da, eta horretarako askotariko eremu estrategikoetan dihardute: ekonomia, energia, hizkuntza.. Urtero milaka ikasle pasatzen dira hezkuntza zentroetatik eta horietan ehunka proiektu eta egitasmo martxan jartzen direla kontuan hartuta, guzti hori lurraldearen garapenerako aprobetxatzearen beharra ikusten dute: “Ikerbiltzak ikasle, irakasle eta adituen jakintza edo mundu hori saretzen du, eskualdeetan egon daitezkeen behar edo proiektuak garatzeko. Behar tekniko, juridiko edota soziologikoak izan daitezke”. Jakintzaren eremuan, hezkuntza formala zein ez-formala bereizten dituzte. Izan ere, diotenez, hezkuntza komunitate hori hezkuntza formaletik sortzen da, baina, herri-jakintzan edo herritarren, herriko eragileen, elkarteetan dagoen jakintza horrek guztiak osatzen du jakintzaren komunitate hori. Ikerbiltza programak zubi lana egiten du. Herri edo eskualde mailan dauden behar eta interesak identikatu, eta horien arabera jakintza zentroekin harremanetan praktikak edo lanak eskaintzen dituzte: “Identifikatuta dauden beharrak eta horiek aurrera eramateko tresnak lotzen ditu”. “Euskal Herriko unibertsitate eta ikasketa zentro desberdinekin harremana dugu, eta arlo desberdinetako lanentzako egitasmoa da gurea. Energia arloa da ardatz nagusienetako bat, baina, adibidez, arkitektura eskolarekin ere lanak egiten dira herrietako mugikortasuna eta antzeko gauzak lantzeko, arlo soziodemografikoan ere lanak egiten dira, arlo teknikoan ingeniaritza eskolekin ere lanak egin izan dira”, azaldu du Udalbiltzako lehendakariak. Beste hiru aurkezpen. Eguerdian Munitibarko Bengola Natur eta Energia Interpretazio Zentroan aurkeztu dute proiektua, baina, datozen asteetan beste hiru aurkezpen egingo dituzte. Markina-Xemeinen, Lekeition eta Ondarroan, esaterako, agerraldi bana egingo dute. Markina-Xemeinen azaroaren 18an aurkeztuko dute, Lea-Artibai ikastetxeko Esperantza aretoan (beste bietako datak zehazteko dituzte).
