Euskal saregileek urteroko asanblada egin dute Lekeition
Euskadiko Saregileen Elkarteko kideek urteroko batzarra egin zuten atzo [urtarrilak 28]. Lekeitioko Azkue aretoan egindako 11. asanbladan Hondarribia, Orio, Getaria, Lekeitio eta Ondarroako 48 emakume batu ziren.
Batzarraren helburua, oro har, urteko gorabeheren balorazioa egitea zela nabarmendu zuen Maite Burgoa Euskadiko Saregileen Elkarteko presidenteak. “Nahiz eta herriko saregileek ordezkarien bidez urtean zer egin den jakin, horri errepaso bat egiten diogu. Aldi berean, batzeko eta harremanak estutzeko aitzakia ere bada asanblada. Bestelakoan, oso zaila da denok batzea. Inork kezkaren bat edo proposamenen bat baldin badauka, gainera, hori azaltzeko aukera egokia da asanblada “.
Kolektiboarentzat hobekuntza soziolaboralak lortzeko egindako jarduerak eta lan duin bat izan dadin egindako ahalegina aztertu zituzten, eta Burgoak azaldutakoaren arabera, iazko urtea ez zen oso emankorra izan. “Ez da berritasun askorik egon”, adierazi zuen. Urteko gorabeheren artean, koefiziente murriztailea aplikatzeko auzia argitu beharra dagoela berretsi zuen presidenteak. Azaldu zuenez, denek batera egin beharko dute eskakizuna, legeak eskatzen duen modura. “Prozesua luze joango dela uste dut, kantauri osoan zehar lanean ari garenak batzea ere ez delako erraza izango. Denbora asko eramango digu, baina hori lortuz gero, ados geratuko ginateke”.
Hainbat urtean egindako ahaleginen ostean, gainera, euren lana profesionalizatzea lortu dutela jakitera eman zuen Burgoak. “Sare josten zekitenentzat, baina titulurik ez zutenentzako azterketak egin dira. Orain, sare josten hasten direnentzat dator arazoa. Ez dago horren inguruko eskolarik, eta titulurik eduki ezean, lanean hasteko arazoak dituzte. Titulua eskuan ez duten bitartean, ezin dute kotizatu ere egin. Itsasoko Gizarte Institutuak erregimen berezian kotizatzeko titulu hori eskatzen die, baina ziklo hori ikasteko aukerarik ez baldin badago, titulua edukitzea ere ezinezkoa da”.
Itsas Garapen Elkarteari buruz berba egiteko tartea ere hartu zuten. Alfredo de Miguelek eman zuen horren berri, eta azaldu zuenez, iaz estrategiaren garapenean buru-belarri sartuta ibili ziren. “Taldean parte hartzen ari garen agente guztiak batu gara; sektorearen ia %100 taldean presente dago”.
Leandro Azkue Eusko Jaurlaritzaren Arrantza eta Akuikultura zuzendaria ere batzarrean egon zen, eta, bere aldetik, saregileei esku bat luzatzeko prest dagoela esan zien. “Gure babesa edukiko duzue”.
Koldo Goitia Lekeitioko alkateak, bestalde, asanblada Lekeition egitea pozgarria izan dela adierazi zuen, baina datuak kezgarriak direla jakitera eman zuen. Gogorarazi zuenez, saregileen kopurua hamar urtean nabarmen jaitsi da, eta arazoari irtenbide bat bilatzea exijitu zuen. “Duela hamar urteko lehen asanblada hartan, Bermeo, Lekeitio, Ondarroa, Orio, Getaria eta Hondarribiko 77 emakume batu ziren. Gaur, 48 emakume batu zarete”.
Leandro Azkue, Maite Burgoa, Ines Susperregi eta Koldo Goitia, atzoko aurkezpenean
Jaurlaritzako eta Lekeitioko udal ordezkariak saregileekin batera, Azkue aretoaren kanpoan
