Errugbi jokalari gazteenek erakustaldi ederra eskaini dute, Mutrikun
Mutriku Rugby Taldeak antolatuta, 12 urtez azpikoen eta 10 urtez azpikoen III. Errugbi topaketak egin ziren atzo [otsailak 5]. Euskal Herriko hainbat txokotatik etorritako 170 bat jokalari batu ziren San Migel futbol zelaian.
Antolatzaileek nabarmendu dutenez, eguraldi petrala egin bazuen ere, iragarritako talde guztiak etorri ziren jokatzera. Mutriku, Eibar, Donostiako Bera Bera eta Atletico San Sebastian, Hernani eta Gazteizko Gaztedi taldeetako kideak batu ziren berdegunean, hain zuzen ere. “Ausardiagaz eta gogoz jokatu zuten”, eta futbol zelaira hurreratu zirenek errugbia hobeto ezagutzeko aukera izan zuten.
Topaketak nesken arteko norgehiagokekin hasi zituzten, eta ostean, mutilen arteko partidak jokatu ziren. Futbol zelaia lautan banatuta jokatu zuten, eta azpimarratu dutenez, errugbizale gazteak pozik ibili ziren elkarren arteko partida motza jokatzen. Erakustaldia amaitu eta gero, hirugarren denbora deritzona egin zuten tabernako terrazan. Azkenik, Mutrikuko produktuekin osatutako otarrea zozkatu zuten, eta bertan agertu zen irabazlea ere. “Goizean bertan saldutako zenbaki bati egokitu zitzaion sari nagusia”.
Mutrikuko errugbi topaketak. Argazkia: Nerea Arrizabalaga / Mutriku Rugby Taldea
Mutrikuarrak errugbian jokatzen. Argazkia: Nerea Arrizabalaga / Mutriku Rugby Taldea
