Mutrikuko Kofradia Zaharreko sutea zerk eragin duen aztertzen ari dira
Zapatuan [otsailak 4] Mutrikuko San Pedro Kofradia Zaharrean egon zen sutearen arrazoiak argitzeke jarraitzen dutela adierazi dute udal iturriek. “Ikerketa martxan dago; Ertzaintza sutearen nondik norakoak ikertzen ari da. Zapatu arratsaldean ibili ziren ertzainak eta gaur [otsailak 6] ere bertan ibili da ertzainburua. Esan digutenez, jasotako datuekin laister aterako dute txostena“, azaldu du Jose Angel Lizardi alkateak.
Ertzaintzak jakitera eman duenez, zapatuan 04:30 aldera jaso zuten larrialdi zerbitzuek abisua, San Pedro Kofradia Zaharreko tabernatik kea ateratzen zela esanez. Sutea itzali ostean, bestalde, segurtasunagatik eraikina itxi egin zuten, eta oraindik ere itxita jarraitzen du. “Gu ez gara sartu, arriskua dago eta. Momentuz, ertzainak sartu dira bertara”.
Ezbehar pertsonalik egon ez baldin bada ere, kalte material ugari egon dira Mutrikuko San Pedro Kofradia Zaharrean. Taberna erabat kiskalita geratu da, eta goian zegoen Bentalekua museoa ere egoera berdinean geratu da. “Taberna erre zen, eta justo tabernaren gaine-gainean harrapatu zuen Bentalekua ere. Erakusketa zegoen tokia, bestalde, ez dakigu zenbateraino erre den. Egia esan, lurreko egur dena kiskali edo goitik behera erori da. Eskailerak geratu dira bakarrik, eta erakusketa gela ere erre egin dela uste dugu”.
Bakarrenetakoa. XX. mende hasierako bentalekuaren makina erre eta galtzea herritarrentzat ondare galera handia dela azaldu alkateak. Kantauri itsasertzean ohikoak ziren egurrezko makinak, eta euskal kostaldean geratzen zen bakarrenetarikoa zen 30 eserlekodun makina, eta horregatik balio etnografiko handia zuen.”Mutrikuarrentzat toki polit bat zen, eta bitxia. Zumaiakoarekin batera, bentaleku bakarra zen Mutrikukoa, eta suak pikutara bidali du. Adin batetik aurrerako denok ezagutu dugu bentalekua, eta bertan egiten zen arrain salmenta”.
Aste honetan, hain zuzen ere, Aranzadikoek bentalekua berriztatzen hasteko asmoa zuten, zitzak janda zegoen eta. Alkateak gaineratu duenez, erreplika bat egitea posible izango litzateke. “Aranzadikoek gaur esan zigutenaren arabera, erreplika bat egitea aukera egongo litzateke, plano batzuen laguntzarekin. Argazki eta bideo ugari dute, eta sutearen nondik norakoen ikerketa amaitzen denean, erre ez diren piezak batzen hasi nahiko luketela esan digute”.
Tabernaren erabilera ere lehiaketara aterata zeukan Jaurlaritzak, eta hilabete honetan amaitzen zen proiektuak aurkezteko epea ere. “Horretan guk interes handia genuen”.
Mutrikuko bentalekua erreta
Bentalekuan egindako arrain salmenta bat
Erlazionatutako edukiaMutrikuko kofradia zaharra erre da
