Oier Mendizabal mutrikuarra, bosgarren Idiazabalgo goitibehera jaitsieran
Oier Mendizabal mutrikuarrak eta Jon Calvok bosgarren amaitu zuten zapatuan [otsailak 4] Idiazabalen jokatu zen denboraldiko lehenengo goitibehera lasterketan. Mutrikuarrak Neumatika kategorian lehiatu zuen. Jakitera eman dutenez, denboraldiko lehen proba, batez ere, goitibeherak probatzeko erabili zuten. Guztira, bederatzi proba jokatuko dituzte, eta hurrengoa maiatzaren amaieran izango da Oñatin. Azkena, berriz, Eskoriatzan lehiatuko dute, irailaren 23an.
Lehenengo lasterketa horretan Busturialdeko Torkan Behera taldeko Ibai Zumalakarregi eta Ibai Ajuriagoikoa Neumatika kategoriako iazko Euskal Ligaren txapeldunak nagusitu ziren.
Trokan Beherako kide horiek, baina, ez ziren emaitza onak lortu zituzten bakarrak izan, beste hainbat taldekide ere ondo moldatu baitziren Izalgo XVII. Goitibeherak txapelketan. Neumatika kategorian lehenengo egitea ez ezik, sailkapen orokorrean gailentzea lortu zuen bertoko bikoteak zapatuan.
Trokan Beherako Itai Maruri eta Andoni Martin gernikarrak ere kategoria berean lehiatu ziren; azken horiek hamahirugarren sailkatu ziren beraien kategorian, eta hamabosgarren, aldiz, sailkapen orokorrean.
Ibai Urrutia gernikarrak, aldiz, Drift Trike kategorian parte hartu zuen, eta sailkapen orokorrean 26. egin bazuen ere, bere kategorian laugarren postua eskuratu zuen. Taldeko Aitor Aransolo eta Koldo Betanzos muxikarrek, berriz, lan bikaina egin zuten, Errodamentuetan garaipena eskuratuta –sailkapen orokorrean 32. postua lortu zuten–.
Trokan Beherakoez gain ere, izan ziren bertoko beste hainbat gidari ere zapatuan Idiazabalen. Samuel Torrico mundakarra eta Aritz Larrinaga, esate baterako, fin aritu ziren Neumatika kategorian; hala, laugarren egin zuten, bai beraien kategorian eta baita sailkapen orokorrean ere.
Oier Mendizabal, Galbaixo jaietako goitibehera jaitsieran parte hartzen.
