Zapato Azulari buruzko saio berezia egingo dute Ondarroako Radixu Irratiko 48 orduetan
48 orduko emanaldi berezia eskainiko dute Ondarroako Radixu Irratiako kideek, bariku [otsailak 10] arraltsaldean hasi eta domeka [otsailak 12] arraltsaldera bitartean. Tarte horretan hainbat programa eskainiko dituzte, eta ohi modura, irratsaio berezia ere prestatu dute Radixukoek. Iragarri dutenez, aurten Zapato Azulari buruzkoa izango da zapatuan [otsailak 11], 12:00etatik 14:00etara eskainiko dena. “Uztailaren 1ean 20. bidar egingo da Zapato Azule, eta horren inguruan ariko gara”.
Eta bi orduko irratsaio berezia kaletik egiten saiatuko dira. Adierazi dutenez, aurretik beste hainbat emanaldi berezi egin dituzte kaletik, baina 48 orduen inguruan horrelako zer edo zer egin nahi duten estreinako aldia izango da. “Eguraldiak laguntzen baldin badu, irratsaio berezia Alamedatik egiteko asmoa dugu. Jendeak zertan ari garen ikustea ere nahi dugu eta”.
Saioari berari dagokionez, Zapato Azularen historiaren errepasoa egingo dute, eta horretarako jaia antolatzen aritu izan direnen oroitzapenak eta bizipenak gogora ekarri nahi dituzte. Errepaso hori egiteko, gainera, gonbidatu bereziak izango dituzte. “Jaia Bolo-Bolok sortu zuen, eta aldizkariko hasierako jendea elkarrizketatzeko asmoa dugu”.
48 orduetan eskainiko diren beste saioak, bestalde, kanpandorreko estudiotik zuzenean emango dituzte. Eta Radixukoek jakitera eman dutenez, 21 irratsaio berezi emango dituzte etenik barik, barikuan 18:00etan hasita; ordu berean amaituko dira 48 orduak, domekan.
Zapato Azulari buruzko saioagaz gain, asteburuko maratoiari begira beste saio berri bat ere eskainiko dela azaldu dute Radixukoek. “Kritikal blues saioa egiten dutenek, beste bi orduko saio bat asmatu dute 48 orduko saioari begira; rockari buruzko Kritikal rock saioa, hain zuzen“.
Bestelakoan, parrilan dauden beste hainbat programa entzuteko aukera izango dute entzuleek, eta baita, desagertutako The adicts, SDR, Hilbera, Ondarruko hooligansak, Kafe ole, Jon Porruren ortua, KBB eta Naranja azule saioak egiten zituztenak batu, eta emanaldi berezia egiteko batuko dira egunotan. Saio horietan guztietan, gainera, herriko gaztetxoek egiten dituzten Bota bosteku, Lorituk FM eta Ganberruk FM entzuteko aukera ere egongo da.
Asteburuan 105,5 FM sintonizatzen duenak, oro har, denetik entzuteko aukera izango duela azpimarratu dute: solasaldiak, magazineak, elkarrizketak, askotariko musika emanaldiak… Eta egunerokoan modura, sarearen bidez ere entzun ahalko dira saio horiek, Radixuren atarian sartuta.
EGITARAUA:
Radixu Irratiko kideak Zapatu Azulean kaletik zuzeneko saioa egiten
Radixukoak iazko 48 orduetako saio berezian
- Otsailak 10, barikua:
- 18:00-20:00: Time to roots.
- 22:00-24:00: Toleta apurtu.
- Otsailak 11, zapatua:
- 00:00-02:00: Kafe ole.
- 02:00-04:00: Jon Porruren ortua.
- 04:00-06:00: KBB.
- 06:00-09:00: OST.
- 09:00-12:00: Hilbehera + SDR.
- 12:00:14:00: Zapato Azula irratsaio berezia.
- 14:00-16:00: Terranobako salau.
- 16:00-19:00: The adicts.
- 19:00-22:00: Sputnik VIP.
- 22:00-24:00: Kritikal rock.
- Otsailak 12, domeka
- 00:00-04:00: Kritikal blues.
- 04:00-06:00: Bon vivant.
- 06:00-09:00: Ondarruko hooligansak.
- 09:00-11:00: Naranja azule.
- 11:00-12:00: Bota bosteku.
- 12:00-13:00: Lorituk FM.
- 13:00-14:00: Ganberruk FM.
- 14:00-18:00: Azken mohikanoak.
