Emakundek berdintasuna egiteko ekintzetara pasatzea aldarrikatu du

Aintzina Monasterio

Amoroto,Aulesti,Berriatua,Etxebarria,Gizaburuaga,Ispaster,Lekeitio,Markina-Xemein,Mendexa,Munitibar,Mutriku,Ondarroa,Ziortza-Bolibar

2017/03/03

Beste urte batez, Emakumearen Nazioarteko Eguna ospatuko da hainbat eta hainbat herritan, martxoaren 8an. Lea-Artibaik eta Mutrikuk egun horregaz bat egingo dute, eta egun horretan zein aurreko eta osteko egunetan ere, hainbat jarduera egingo dituzte, aldarrikapenak tarteko. Berdintasuna nire baitan hasten da lelopean aurkeztu du Emakundek aurtengo Emakumeen Eguna. Horrela, gizarte berdinzale bat eraiki eta lortzeko bidean norbanakoak duen erantzukizuna azaleratu gura dute, berdintasuna sustatzen duten jarrera eta ekintza pertsonalen garrantzia azpimarratuz. Martxoaren 14ra arte iraungo duen kanpainan eguneroko adibide baikorrak ageri dira, norbanakoak bere inguru hurbilenean berdintasun arloan egin ditzakeen ekarpenak azalduz. Sare sozialetan. Herritarrak adibide horiek erakustera gonbidatu dituzte, eta horretarako sare sozialetan adibideak ematera animatu dituzte, #BerdintasunaEgitenDut traola erabiliz. Izaskun Landaida Emakunderen zuzendariak berdintasuna lortzea herritar denen erantzukizuna dela nabarmendu du: “Erakundeena, mugimendu sozialena, enpresena, familiena, ikastetxeena, komunikabideena, era guztietako entitateena… Eta baita ere pertsona bakoitzarena. Pertsona bakoitzak bere eragin eremuan zerbait egin dezakeelako berdintasunaren alde. Guraso bezala, lagun bezala, hezitzaile bezala, bezero bezala, enpresa bateko arduradun bezala… Kanpainak dion moduan, gero eta gehiago dira ekintzetara pasatu diren pertsonak, eta eredu hauek erakutsi nahi izan ditugu”. Ez ohiko batzarra. Eudelen eta Emakunderen lankidetzagaz, Araba, Bizkai eta Gipuzkoako emakume hautetsiek Emakumeen lehenengo ez ohiko batzarra egin zuten Gernika-Lumoko Batzarretxean, eguaztenean. Emakume alkate, zinegotzi, batzarkide eta legebiltzarkideak batu ziren, eta baita euskal alderdi politikoetako ordezkariak ere. Gizonezkoek gonbidatuen eserlekuetatik jarraitu zuten saioa.

Adierazpen Instituzionala irakurri zuten eguaztenean, Gernika-Lumoko Batzarretxean.
Argazkia: EUDEL.

Sei alkate eta zinegotzik Adierazpen Instituzionala irakurri zuten; haien artean zegoen Idurre Bideguren Bermeoko alkatea. Eta besteren artean, Markina-Xemeingo eta Berriatuko udal ordezkariek ere parte hartu zuten ekitaldian. Eudelek prestaturiko adierazpenean, Europako Txostenaren aholkuak eta emakumeek eta gizonek tokian tokiko bizimoduan izan behar duten Bardintasunerako Europako Gutunetik sortutako konpromisoak azaldu zituzten. Horregaz batera, Emakumeen eta Gizonen arteko Bardintasunerako 4/2005 Legean ezarten diren betebeharrak ere gogora ekarri zituzten. Zein bere esparrutik zortzi aholku bultzatzeko konpromisoa hartu zuten. Besteren artean, erabakitzeko organo garrantzitsuenetan ordezkaritza orekatua bermatzearen aldarrikapena egin zuten. Baita hautatutako emakume ordezkariak eskumen banaketa edo funtzio esleipen estereotipauen edo bestelako diskriminazio edo jazarpen moduen eraginpean izatea eragozteko zenbait mekanismo ezartzea eta emakumeen ahalduntzea ahalbidetzen duten ekintza zehatzak ezartzea. Ekintzaileen topaketa. Beste urte batez, Martxoaren 8ari begira adierazpen instituzionalak onartuko dituzte udalerrietan, eta horregaz batera, eguaztenean zein datozen egunotan, elkarretaratzeak, bazkariak, hitzaldiak, irteerak eta askotariko ekitaldietan elkartuko dira herritarrak. Esaterako, eguaztenean, Emakume Ekintzaileen Topaketa Irekia egingo dute Markina-Xemeingo Berrikuntza Gunean. Leartibai Garapen Agentziak eta Azaro Fundazioak elkarlanean prestaturiko ekitaldi horren helburu nagusia Lea-Artibai eskualdeko emakume ekintzaileek elkar ezagutzea eta haien beharrizanak azaleratzea da. Dinamika parte hartzailea izango da. Izan ere, parte hartzen duten ekintzaileek esperientziak kontatu, eta kezkatzen dituzten gaiak azaltzeko aukera izango dute, sormena oinarritzat hartuta. Emakumeekin, Euskadiko Emakume Ekintzaileen Elkarteko Izaskun Rama aholkulari eta hezitzaileak dinamizatuko du saioa. Izena eman nahi izanez gero, 94-684 34 95 edo 94-616 91 72 telefono zenbakira deitu edo merkataritza@leartibai.com edo vmartinez@azarofundazioa.com posta elektronikora idatzi behar da. EGITARAUAK: AMOROTO:

Martxoak 11 eta 12. Lehengo eta gaur egungo emakumeen lanei buruzko argazki erakusketa, Herriko Tabernan.

AULESTI:

Aulesti (Zemendia, gazte asanblada eta berdintasun batzordea) Martxoak 8, barikua. 20:00. Osoko bilkura berezia. Ostean: elkarretaratzea plazan.
Martxoak 10, barikua. 20:00. Pintxo poteo herrikoia trikitilariek lagunduta.

BERRIATUA:

Martxoak 8, eguaztena. 19:00. Elkarretaratzea, udaletxe aurrean.
Martxoak 9, eguena. 17:00. Udal liburutegian, ipuin kontalaria: Haur jolasa.
Martxoak 10, barikua. 19:30. Bideo gelan, Kapulana bat zintzilik bertso jarriak Miren Amurizagaz.

GIZABURUAGA:

Martxoak 8, eguaztena. 19:00. Txokolate jana, txokoan. Ostean. Opari banaketa.

LEKEITIO: (Berdintasun Batzordea)

Martxoak 8, eguaztena. Ikasleek Eskolapea eta Zineko plaza apainduko dituzte.
Martxoak 12, domeka. 11:00-14:00. Lekeitioko eta Inguruko Emakume Sortzaile eta Ekintzaileen Azoka, Kontzijopean eta Barandiaran aretoan.

(Potxuak martxan)

Martxoak 8, eguaztena. 19:00. Brindisa, Eskolapean.
Martxoak 10, barikua. 18.00. Loba, Azkue aretoan.
Martxoak 11, zapatua. 10.00. Mendi ibilaldia (Eskolapetik irtenda). 12.30. Kalejira Kriston portaletik. 13.00. Bertsolari saioa, plazan. 22:00. Emakumeen afaria, Mantxuan (izen ematea bertan edo Eskolapeko botikan). 00:00. Jai feminista Dzaparten, Dj Mapatxegaz.

(Zinemazale elkartea)

Martxoak 11 eta 12. 19:30. Figuras ocultas, Ikusgarri aretoan.
Martxoak 13, astelehena. 20:30. Figuras ocultas, Ikusgarri aretoan.

MARKINA-XEMEIN:

Bihar. 20:00. Uhagonen: Konpasetan.
Martxoak 5, domeka. Lilatoira irteera.
Martxoak 8, eguaztena. 20:00. Elkarretaratzea, Goiko Portalean, Bagaittunek deituta. Ostean. Mosaikoa.
Martxoak 11, zapatua. 18:00. 90 semanas y media antzerkia, Uhagonen. 19:30. Manifestazioa. 21:30. Emakumeen afaria, Bekobentan.

(Leartibai Garapen Agentzia eta Azaro fundazioa)

Martxoak 8, eguaztena. Berrikuntza gunean, emakume ekintzaileen topaketa irekia: 14:30-14:45. Ongietorria eta aurkezpena. 14:45-15:30. Storytelling dinamikaren azalpena eta hasiera: Kontaiguzu zure esperientzia. 15:30-16:30. Beharrizanen mahai ingurua. 16:00-16:45. Kafe mintzaldia.

MENDEXA:

Martxoak 25, zapatua. Kuku-Habixa elkarteak antolatuta, Zestoara irteera (udaletxean izena eman behar da).

MUNITIBAR:

Martxoak 8, eguaztena. 19:00. Autobus geltokian, elkarretaratzea.
Martxoak 10, barikua. 17:00. Herriko plazan, Gure gorputzak ezagutzen eta marrazten tailerra.

MUTRIKU:

Bihar. 12:30. Hau ez da gure bakea ekitaldi nagusia, Goiko plazatik.
Martxoak 5, domeka. 19:00. EMA Gunean, Miss Escaparate zine foruma.
Martxoak 8, eguaztena. 18:00. Elkarretaratzea, Goiko Plazan.
Martxoak 9, eguena. 18:00. EMA Gunean, kafe tertulia, Alicia Satueren eskutik.
Martxoak 11, zapatua. 13:00-15:00. Miruaitzen, emakumeen pala txapelketa.
Martxoak 19, domeka. 18:00. Zabielen, Bihar taldearen Garaiz ikasi txotxongilo ikuskizuna.
Martxoak 19tik 26ra. Sexologia saioak, EMA Gunean. Hilaren 19an. 16:00etatik 18:00etara, DBH 1 eta 2 mailak. Hilaren 26an. 18:00etatik 20:00etara, DBH 3 eta 4 mailak.
Martxoak 26, domeka. 19:00. Zabielen, Limondoak, mitxoletak eta boleroak helduentzako ipuin kontaketa.
Apirilak 7, barikua. 22:30. Gaztetxean, Erradikalak gara ikuskizuna, Bea eta Anerekin.
Apirilak 8, zapatua. 10:30-14:30. EMA Gunean, Rap-etik zx tailerra, Nerea Loron La Furiaren eskutik.
Apirilak 20, eguena. 18:00. EMA Gunean, Transexualitatea hitzaldia, Chrysallis elkartearen eskutik.

ONDARROA:

Martxoak 8, eguaztena. 19:00. Alamedan, elkarretaratzea, Andrabanda eta bertso brindisa.
Martxoak 11, zapatua. 21:00. Antiguako Aman, luntxa eta dantzaldia.
Martxoak 12, domeka. 13:00. Kofradia Zaharrean, Bai, maite dot neure buru! ekintza publikoa.
Martxoak 14, eguaztena. 19:00. Etxelilan, 10 ingobernables. Historias de transgresion y rebeldia liburuaren aurkezpena, Pikara magazineko June Fernandezen eskutik.
Martxoaren 16tik 31ra. Etxelilan, Jaizkibel konpainiaren 20 urteak erakusketa.
Martxoak 17, barikua. 20:30. Etxelilan, Olatz Salvadorren kontzertua.
Martxoak 19, domeka. 11:00. Arrigorrin, Borroka armatua eta kartzelak liburua aurkeztuko dute Zuriñe Rodriguez eta Oihana Etxebarrieta egileek.
Martxoak 23, eguena. 18:00. Etxelilan, Jaizkibel konpainiaren 20 urteak erakusketaren bisita gidatua eta Alardearen seme-alabak zine foruma.
Martxoak 24 eta 25. Etxelilan, Estatu feminista eta federala eraikitzen ikastaroa, Jule Goikoetxearen eskutik.
Martxoak 27, astelehena. 18:00. Beikozinin, Mujeres y ciencia, una ecuacion imposible? hitzaldia. Hizlaria: Maria Macho Stadler matematikaria.
Apirilak 2, domeka. 11:00. Arrigorrin, Miren Odriozolaren Laura deitzen zioten liburuaren aurkezpena, idazlearen eta Leire Ibarguren eskutik.

ZIORTZA-BOLIBAR: (Aranbaltz Kultur Elkartea)

Bihar. 18:00. Leena Yadaw indiarraren La estación de las mujeres filma, 16 urtetik gorakoentzat, batzar gelan. Ostean, txokolate eta pastel dastaketa.