Giro ederra egon da Mutrikun, Gipuzkoako herriarteko bertso txapelketan
Bertso afari giroan jokatu zuten aurreko zapatuan [martxoak 4] Gipuzkoako herriarteko taldekako txapelketa. 60 bat lagunen aurrean giro ederrean jokatu zen Arnope (Mutriku, Deba eta Mendaro) eta Hernani2 taldeen arteko norgehiagoka.
Arnope taldetik Xabi Astigarraga, Imanol Lekunberri Txilin eta Antton Aizpuruak parte hartu zuten, eta Hernani2 taldetik, berriz, Oier Iurramendi, Iker Osa eta Iker Ormazabalek. “Aipagarria izan zen Iker Ormazabal gaztetxoak 16 urterekin erakutsi zuen ofizioa, eta entzuleengandik jaso zituen txaloak”. Eta Gaztetxean ederto batean afaldu eta gero, Unai Belaustegi gai jartzailea izan zuten gidari sei bertsolariek.
Saioari hasiera Arnope taldeak eman zion, agur dotorearekin. Arraunak eskutan eta marinel jantzita, trikitiaren laguntzarekin bertsokatu zituzten Mutrikuko kantuak, eta giro beroa sortu zen hasieratik Gaztetxean. Agurren ondoren, “bizi eta azkar” joan zen saioa. Bi taldeek nahikoa saio parekatuak egin zituzten ofiziokako bertsoaldietan, puntu erantzunetan eta oinak emandako ariketetan. Saioaren amaieran gozamena eta irribarren nagusi izan ziren guztien ahotan.
Sailkapenari dagokionez, Hernani2 taldea nagusitu zen Mutrikun, etxeko taldeari 13-11 irabazita. “Hernanikoak nagusitu ziren zortziko txikian eta bakarka, eta koplatan, aldiz, Arnope taldea nabarmendu zen”.
Bizkaiko txapelketa. Bizkaiko taldekako txapelketa ere martxan hasita dago, eta etzi [martxoak 10] saio bat jokatuko da Ondarroan. Bertan, Ondarroako Arri-Botx Bertsutan taldearekin batera, Eta abarrak eta Koipelustre’s taldeak ariko dira kantuan.
Antolaketak iragarri duenez, gainera, bertsolariek hiru saio eskainiko dituzte Ondarroan; lehenengoa 19:00etan egingo da Anaitasuna tabernan. Eta hurrengo bi saioak Gaztetxean eta Beikoizinin egingo dira, hurrenez hurren, 20:30ean eta 23:00etan.
Arnope eta Hernani2 taldeko kideak, Mutrikun. Argazkiak: Arnope taldea
