Oihal artean lan egiten dutenen oihartzuna
Marta Perez Elosuaren ustez, une bakoitza adierazteko beharrizana dago, eta behar hori asetzeko, argazkiak ateratzen ditu. Oraingoan, oihalen artean murgildu da, eta industriak eragozpen «handiak» jartzen dizkien diseinatzaileei eman die ahotsa.Argaz...
Marta Perez Elosuaren ustez, une bakoitza adierazteko beharrizana dago, eta behar hori asetzeko, argazkiak ateratzen ditu. Oraingoan, oihalen artean murgildu da, eta industriak eragozpen «handiak» jartzen dizkien diseinatzaileei eman die ahotsa.
Argazkilaritza, moda, jatorria eta nortasuna uztartzen dituen erakusketa jarri du ikusgai Marta Perez Elosua argazkilari portugaletetarrak Gernika-Lumoko Kultur Etxean. Guztira, 20 argazki bildu ditu Oihal artean izeneko bilduman.Euskal Herriko diseinatzaile berri onenekin harremanetan jartzea zen Perezen asmoa; «haien diseinuak erakusgai jartzea eta haiei buruzko zerbait azaltzea». Ohiko modako argazkitik haratago joan nahi zuen Portugaleteko argazkilariak; diseinu bakoitza diseinatzailearen jatorriagaz eta nortasunagaz zerikusia duten lekuak nabarmendu nahi zituen. Eta hala egin zuen, ideia batetik errealitatera jauzi eginda.
Hamar diseinatzaileren lanak biltzen ditu erakusketan; horien artean, Paul Txertudi gernikarrarenak. Busturialdeko diseinatzaileak Joana Porres izan du modelo bere diseinuak janzten, eta Gernika-Lumoko Europa parkea izan zuten agertoki argazkiak ateratzeko unean.
Hamar diseinatzaile
Txertudik egindako lanez gain, Jon Mikeo, Eder Aurre, Antxia anaiak, Nerea Sanchez Bediaga, Peio Duran, Maria Blanco, Miriam Ruiz Briz, Janire Olano eta Maria Garcia Ezkerro diseinatzaileenak ere ikusi daitezke Gernika-Lumoko Kultur Etxean ikusgai jarritako erakusketa horretan.
Modaz eta argazkilaritzaz gozatu nahi duenak, hortaz, martxoaren 17ra arte izango du horretarako aukera.
