Bonbardaketari lotutako ekimenez beteko dute apirila gernikarrek
Herriko hainbat taldek apirilerako prestatutako egitarau bateratua eta Ongi Etorri Errefuxiatuak Bizkaia plataformak antolatutako ekimenak aurkeztu dituzte AstranGernika bonbardatu zutela 80 urte beteko dira aurten, eta Ongi Etorri Errefuxiatuak Bizkai...
Herriko hainbat taldek apirilerako prestatutako egitarau bateratua eta Ongi Etorri Errefuxiatuak Bizkaia plataformak antolatutako ekimenak aurkeztu dituzte Astran
Gernika bonbardatu zutela 80 urte beteko dira aurten, eta Ongi Etorri Errefuxiatuak Bizkaia plataforma ekimen berezia antolatzen ari da apirilaren 29rako eta 30erako. Era berean, herriko hainbat taldek Gernika 80, 1937-2017 herri ekimena antolatu dute, eta apirilerako hainbat ekimen antolatu dituzte. Bata zein bestea aurkezteko, Astran batu ziren zapatuan antolatzaile denak.Gernika Batzordeko, Arrano Kultur Elkarteko, Gernika Garretaneko, Sare Gernika-Lumoko, Lobakeko, Gite Ipeseko, NKAP-eko, Gernika Gogoratuzeko eta Ongi Etorri Errefuxiatuak Bizkaia plataformako ordezkariek parte hartu zuten agerraldian, eta egitarau bateratua aurkeztu zuten. Hala, besteak beste, mahai inguruak, antzezlanak, hitzaldia, manifestazioa eta ibilaldia antolatu dituztela aurreratu dute.
Bestalde, «gerrarik ez» oihukatzeko eta «errefuxiatu eta migratzaileak ongietorriak» direla adierazteko, errefuxiatuekin elkartasunerako nazioarteko topaketa eta Tipi-Tapa, Tipi-Tapa errefuxiatuen aldeko ekimena antolatu dituzte apirilaren 29rako eta 30erako.
Modu horretan, apirilaren 29an, zapatuan, errefuxiatuei babesa emateko ibilaldiak egingo dituzte. Oinez zein bizikletaz, Euskal Herri osotik Gernika-Lumora helduko diren jende zutabeak mobilizatuko dituzte. Euskal Herriko txoko guztiak bandera horiz eta malko gorriz bete gura dituztela adierazi dute.
Zutabeak
Zutabe guztiak Muxikan batuko dira apirilaren 29an, 16:00etan. Handik elkarregaz egingo dute bidea Gernika-Lumoraino. 16:30ean, Lurgorriko biribilgunetik, pankarta barik, isiltasun osoz, musikak soilik lagunduta, Pasealekurako bidea hartuko dute, «bonben eraginez hil diren edo beren etxeak utzi behar izan dtuzten pertsonen omenez».
Bide batez, 80 urte geroago, «gerra ikaragarriak ikusi behar izatea eta pertsona ugarik migratzen eta babesa bilatzen jarraitu behar izatea» salatuko dute. Pasealekura iristerakoan, iraganeko eta gaurko Gernikaren oroimenez, ekitaldi «hunkigarria» egingo dutela esan dute. Giza eskubideen eta bakearen mundu mailako erreferenteak bertaratzea aurreikusten dutela azaldu du Nati Ovelleiro Ongi Etorri Errefuxiatuak Bizkaia plataformako kideak.
Hainbat herritan prest daude zutabeak, horietako asko, apirilaren 28an abiatuko dira, 29an Gernikara iristeko. Bermeotik ere zutabe bat abiatuko da.
Apirilaren 30ean, bestalde, gaikako tailerrak eta esperientzien trukaketak egingo dituzte: Babeserako eskubidea, antimilitarismoa, feminismoa, faxismoari eta arrazakeriari ez, antikapitalismoa, harrera esperientzia, hegoaldeko muga eta desobedientzia landuko dituzte. Horien guztien helburua honakoa da: «Hainbat esperientzia, konpromiso eta gizarte borroka ikugai jartzea eta gerturatzen diren mugimendu eta elkarteen artean sareak eraikitzen jarraitzea».
Aurkezpena egin ondoren, Astra kanpoan elkarretaratzea egin eta komunikatu bat irakurri zuten; izan ere, martxoaren 18an urtebete igaro da EBren eta Turkiaren arteko itunaren ondorioz mugak itxi zirenetik. Komunikatuan irakurri dutenez, «erabaki horrek bizi baldintza ankerretan utzi ditu milaka migratzaile eta errefuxiatu, atxiloketa zentroetan sartuta». Era berean, bat egin gura izan dute Europa osoan deitutako protesta ekintzekin, eta akordioa abiatu ostean harrapatuta geratu ziren 62.000 errefuxiatuen egoera salatu dute, gainera. «Ezin da hitz egin harrera zentroez, bertan jendea hotzak jota hiltzen baldin bada. Egeoko uharteak kartzela bihurtu dira, Greziako erakunde solidarioak salatzen ari direnez».
Topaketen aurkezpena
Errefuxiatu eta migratzaileei babesa adierazteko, Ongi Etorri Errefuxiatuak Plataformak zapatua aukeratu zuten Ongi Etorri Gernika 2017 Nazioarteko Topaketa aurkezteko: Gernikako kolektiboekin batera: «Gaur, sekula ez bezala, beharrezkoa dugu Gernikan gertatu zena biziki oroitzea eta ‘aski da’ esatea milioika pertsona ihes egitera behartzen dituen beste Gernika horietan gertatzen ari denaren aurrean. Bihur dezagun lurralde, auzo, herri, hiri… bakoitza harrera lurralde».
