Telleriak eta Condek irabazi dute Beteranoen Trinkete Txapelketa
Domeka goizean jokatu ziren 3, 4, 5 eta 6. postuak eta finalak Lekeitioko trinketean. Finaleko jokalari onenaren saria ere eraman du Telleriak. Jaunarenaren parte hartzea eskertu duteDomeka goizean jokatu zen Lekeition Beteranoen Trinketeko Esku Pilota...
Domeka goizean jokatu ziren 3, 4, 5 eta 6. postuak eta finalak Lekeitioko trinketean. Finaleko jokalari onenaren saria ere eraman du Telleriak. Jaunarenaren parte hartzea eskertu dute
Domeka goizean jokatu zen Lekeition Beteranoen Trinketeko Esku Pilota Txapelketaren final handia. Sei bikoteren arteko norgehiagokagaz eman zioten amaiera urtarrilean hasitako ligaxkari. 5. eta 6. postuak, 3. eta 4. postuak eta finala ikusteko aukera izan zuen trinketean bildutako publikoak.Laka eta Arrate bikotearen eta Jaunarena eta Foster bikotearen artean lehiatu zituzten 5. eta 6. postuak. Arrateren aurrelariak ezin izan zuen finalean egon, eta beraz, Laka mendexarrak hartu zuen bere postua. Hasieran berdinduta joan ziren bikoteak, eta 19-19 ere berdindu zuten, baina hortik aurrera gehiago izan ziren Laka eta Arrate, 30-23 irabaziz.
Telleria, finaleko onena
30-17 irabazita, 3. postua bere egitea lortu zuten Moralek eta Lakak, eta 4. postuagaz geratu ziren Jaunarena eta Etxebarria. Berazak ezin izan zuen norgehiagoka jokatu, eta bere postua Jaunarenak hartu zuen. Moral boleaz eta dejada bikainak eginez jaun eta jabe izan zen, eta galtzaileek ezin izan zioten markagailuari buelta eman.
Telleriak eta Condek ez zieten aukerarik eman Astigarraga eta Egañari finalean. Nahiz eta mendarotar eta gernikar asko egon Egaña animatzen, ezin izan zuten Telleriaren joko ona gainditu. Condek txukun bete zuen bere egitekoa, pilota gutxi galduz eta aurrelaria animatuz, eta merezimendu guztiz jantzi zuen bere lehen txapela. Telleriarentzat, iazkoa kontuan izanda, bigarrena izan zen. Horrez gain, aurtengo finaleko jokalari onenaren saria ere eraman zuen German Telleria mallabiarrak «bere kokapen, pilotari ematen dion abiadura, eta dejada eta joko politagatik».
Txapelketaren antolakuntzak gogoratu duenez, Lekeitiokoa da Euskal Herriko Beteranoen Txapelketa bakarra, eta ohore bat dela esan dute Nafarroako jokalari bat ere partaide izatea. Bide hori landu nahian, joan den astean partaide gehienak Jaunarenaren herria Garzaron bisitatu, eta torneo bat jokatu zuten bertan. Horrez gain, «merezitako» omenaldia eskaini zioten, eta hori Lekeitiora ere ekartzeko asmoz, opari sorta bat eman zioten, «bere ahalegin eta kemena» eskertzeko.
Finalaren ondoren, txapelketa aurrera eramateko urtero ateratzen duten otzararen zozketa egin zuten; irabazlea Enara Madariaga gernikarra izan zen.
