Kamiñaldeko mendiko lanek baldintzatutako aurrekontuak onartu ditu Ondarroako Udalak
Bederatzi milioi eta erdiko aurrekontua onartu dute, EH Bilduren aldeko botoekin eta EAJren abstentzioagaz. Udaleko diru sarrera kopurua jaistea eta Kamiñaldeko gaia bideratzeko ongizate, hirigintza eta ogasun sailetan 258.000 euro jarri behar izateak asko baldintzatu ditu.
Inbertsioetarako 500.000 euro bakarrik izatea aurreikusi du udalak, beti ere Txomin Agirreko aparkalekuak saltzeko aukera izango duela kontuan hartuta. Hau horrela izan ezean, diru kopuru hori ere murriztu egingo litzateke.
Zerbitzuak bere horretan mantentzeko ahalegina egingo du udalak, nahiz eta Herri Busaren eta kiroldegiaren kostuak, esaterako, handitu egingo diren. Beharrezkoa ikusten dute gainkostu horri aurre egitea, herritarren ongizatea eta iriste erraztasuna bermatzeko : “Orain esfortzu bat izango da gainkostu horri aurre egitea, baina badakigu herritarrek zerbitzu horien premia daukatela, eta, beraz, beharrezkoa dela horiek mantentzea”, adierazi du Zunbeltz Bedialauneta alkateak.
Diru gutxi izan arren, hortaz, udalak bere asmoekin jarraitzeko asmoa dauka. Kamiñazpiko parkea eraberritu eta hondartzako txiringitoko sukaldea berritu nahi dituzte. Argiterian ere aldaketak egin nahi dituzte, eta LED argiztapena jarri, kontsumoa eta energia aurrezteko. Magdalena eta San Juan Txurru kaleetako iriste erraztasuna ere hobetu beharrekoak dira udalarentzat, eta horretarako espaloiak konpontzea aurreikusi dute. Eneritz Basurko hirigintza zinegotziak nabarmendu du, “egiteko gauza asko egon arren, herriko auzo guztietara iristeko asmoa” daukatela. Jada martxan dauden egitasmoekin jarraitzea ere garrantzitsua dela iritzita, herriko ziburuetan egiten ari diren konponketekin jarraituko dute.
Kamiñazpiko parkea eraberritzeko asmoa dauka Ondarroako Udalak. Argazkia: Ondarroako Udala
Oposizioko alderdi bakarrak, EAJk, udal gobernuak aurrekontuak beranduegi eman zizkiola esan du, “azken orduan”.Udal eraikinetan ere hobekuntzak egiteko asmoa dauka udalak. Etxelilan eta udaletxe zaharrean, esaterako, berogailu sistema aldatuko dute. Alkateak egoera konplikatua dela aitortu du, baina aurrekontuei jarraipen zehatza egin eta beste arloetan gastatzen ez dena herritarren onurarako diren inbertsioetarako erabiltzeko konpromisoa hartu du Bedialaunetak. Udalean dagoen oposizioko alderdi bakarrak, EAJk, udal gobernuak aurrekontuak beranduegi eman dizkiola esan du, “azken orduan”. Bestalde, jeltzaleek nabarmendu dute bat datozela udalak herritarrentzako gutxiengo zerbitzuak mantentzearen alde egindako apustuagaz, baina orokorrean uste dute udala ez dagoela tresna egokiak jartzen herriko erronkei eta arazoei aurre egiteko. 2017ko aurrekontuak, ALORREZ ALOR:
- Aniztasun batzordea: 33.250,00 euro.
- Ingurumen batzordea: 120.189,03 euro.
- Berdintasuna: 157.086,06 euro.
- Euskara batzordea: 157.428,16 euro.
- Kultura batzordea: 487.538,56 euro.
- Hezkuntza batzordea: 618.149,38 euro.
- Ogasuna: 653.943,28 euro.
- Kirol batzordea: 826.783,06 euro.
- Ongizate batzordea: 1.754.718,12 euro.
- Hirigintza batzordea: 1.939.991,52 euro.
- Presidentzia: 2.705.509,28 euro.
