Errekaleor auzoaren aldeko manifestaziora joateko autobusak egongo dira Lea-Artibain
17:30etan hasiko da Errekaleor auzoaren aldeko manifestazioa Gasteizko Andra Mari Zuriaren plazan, Errekaleor Bizirik elkarteak deituta eta Guk argi daukagu, herria bizirik: Errekaleor defenda dezagun lelopean.
Ondarroako autobusa 15:30ean aterako da Zaldupeko zubiaren paretik. Autobusean izena emateko, Anaitasuna edo Kulixka tabernetan edo ogaondarru@gmail.com helbide elektronikoan izena eman behar da. Ondarroako Gazte Asanbladak jakitera eman duenez, Gasteizera joateko autobuserako lekuak mugatuak dira, beraz, joan nahi dutenei azkar ibiltzeko deia egin diete.
Lekeitiarrak eta markina-xemeindarrak autobus berean joango dira Gasteizera. 16:00etan aterako da autobusa Markina-Xemeindik; lekeitiarrak 15:30ean aterako dira Mandaskatik, euren autoetan Markina-Xemeinerantz. Autobusean izena emateko mozoluak@gmail.com helbide elektronikora mezu bat bidali behar da.
