35 ikuskizunez gozatzeko aukera eskainiko du 28. Kalekak
Nazioarteko 25 konpainiak parte hartuko dute kale antzerki jaialdiaren programa ofizialean. Espazio publikoa parte hartze kolektiborako gune bihurtuko duteUztailaren 5etik 9ra bitartean, 35 ikuskizunez gozatzeko aukera eskainiko du 28. Kalekak. Klowna,...
Nazioarteko 25 konpainiak parte hartuko dute kale antzerki jaialdiaren programa ofizialean. Espazio publikoa parte hartze kolektiborako gune bihurtuko dute
Uztailaren 5etik 9ra bitartean, 35 ikuskizunez gozatzeko aukera eskainiko du 28. Kalekak. Klowna, zirkua, erorketak, esku hartze espazialak, performance, inprobisazioa, dantza garaikidea, akrobaziak, musika, piroteknia, dantza bertikala eta askoz gehiagok osatuko du aurtengo jaialdia. Lekeitioko kale, plaza, portu, hondartza, bai eta eliza nagusiko kanpandorrea ere izango dira, besteak beste, era guztietako kale ikuskizunen agertoki.Agertoki horietako bat aukeratu zuten atzo ere Kalekaren 28. jaialdia aurkezteko. Emanaldien aurrerapen modura, Mr Pichichi antzezlana ikusteko aukera egon zen hasteko, eta aurtengo jaialdiaren nondik norakoak aurkeztu zituzten ondoren Koldo Goitia Lekeitioko alkateak, Aitziber Atorrasagasti Eusko Jaurlaritzako Kultura Sustapen zuzendariak, Andoni Iturbe Bizkaiko Foru Aldundiko Kultura zuzendariak eta Maider Illana Kalekaren kudeatze taldearen zuzendariak. Mertxe Arrizubieta Lekeitioko Kultura zinegotziak eta Roberto Ferro Phil Otajole konpainiako kideak ere parte hartu zuten aurkezpenean.
Inbertsioa
Kalekaren programa ofizialagaz gain, beste sekzio berri bi sortu dituztela azaldu zuen Lekeitioko alkateak. «Kaleka Scrach atalean esperimentazioan dauden ikuskizunak erakutsiko zaizkio jendeari euren erreakzioa ikusteko, eta Kalekaz Blai urtean egiten diren ekintzak dira».
Lekeitioko kale antzerki jaialdiak iaz hausnarketa prozesu bat izan zuen, eta horren ondorioa aurten ikusiko den eredua izango dela adierazi zuen Eusko Jaurlaritzako Kultura Sustapen Zuzendariak. Eredu berriak kultura askoz gehiago gizarteratzen eta kaleratzen duela azpimarratu zuen Atorrasagastik, eta sentsu horretan bat egiten duela esan zuen Eusko Jaurlaritzaren Kultura Sailetik bultzatzen ari diren politikekin. «Horregatik, aurten ere, jaialdiaren aldeko apustua egin dugu, eta diru laguntza emateko ahalegina egin dugu, horrelako jaialdi garrantzitsu bat egonkortzeko».
Kultura gastu bat barik inbertsio bat dela esan zuen, bestalde, Andoni Iturbe Bizkaiko Foru Aldundiko Kultura zuzendariak. «Jakin badakigu Lekeitiok baliabide natural ugari dituela, baina guk beste balore bat ere kontuan hartzen dugu: kultura. Kultura ez da gastu bat baizik eta inbertsio bat, eta guretzako kultura balore publikoa ere bada».
Lekeitioko Udala eta antolakuntza ere zoriondu zituen Iturbek 28 urtetan horrelako proiektu bat aurrera eraman duelako. «Badakigu gure sektorean ekonomia aldetik ez gabiltzala oso zabal, eta nik zorionak eman nahi dizkiet udalari eta antolatzaileei. Ez galdu daukagun kultur balorea; beste baloreak bertan badaude, baina balore publikoa guk ekartzen diogu herri honi kulturaren bitartez, eta horrela jarraitzera animatzen dugu Lekeitioko Udala».
Maider Illanak eman zituen aurtengo jaialdia osatuko duten hiru sekzio ezberdinei buruzko xehetasun guztiak. Azaldu zuenez, aurten 25 kolektibo eta konpainiak parte hartuko dute nazioarteko kale antzerki jaialdiaren programa ofizialean. Euskal Herritik, Kataluniatik, Alacantetik, Valentziatik, Andaluziatik, Gaztela Leonetik, Eskoziatik, Frantziatik, Ipar Irlandatik eta Kroaziatik datozenak.
Horrez gain, 28. jaialdiak espazio publikoa topaketa eta parte hartze kolektiborako aukera bat bezala proposatzen du. Horrela, uztailean sorkuntzaren eremuko lau kolektibo profesionalek adin guztietarako ekintzak proposatuko dituzte: Txikiarkt-ek hiri arkitekturan esku hartzera gonbidatuko ditu umeak jokoen bitartez; Ciclalab-ek Basurama Kolektiboagaz hasitako ekintzei jarraipena emango die, eta Johnny Melvillek arte eszenikoetan profesionalak direnentzako tailerra emango du.
Kaleka Scrach atal berriaren baitan, berriz, garatzen dauden formatu ezberdineko bost lan aurkeratu dituzte: Bridging The Silence instalazio interaktiboa, Ehkie taldearen Karabana Norte dantza inprobisatuko erakustaldia, Teatro Reformaren Tomando Medidas kale antzerki ibiltaria, The Funes Troup taldearen Mini eta Compañia Calor taldearen Martirio y Adela mikro-teatro lagina eta Lekeitioko Muntu antzerki amateur taldearen ikuskizuna.
Kalekaz Blai jaialdiaren hirugarren atalak urteko ekintzen presentzia jarraia bultzatzen du. Horrela, Lekeitioko hezkuntza zentroekin lan egitea dute asmoa, Euskal Herriko bi konpainiekin batera: Phil Otajole eta Cia Tornado. Mr Pichichi ikuskizunean oinarrituta tailerrak izan dituzte ikastetxeetan, eta atzo plazan egin zen antzezlanean parte hartu zuten ikasleek.
Kolaborazioak
Jaialdi horrek, gainera, herriko kultur elkarteekin kolaborazioak sendotzen diharduela azpimarratu zuen Illanak. Arropaineko Arragua sorkuntza espazioak instalazio interaktibo soinuduna, kontzertu pedagogikoa eta dantza-zirku ikuskizuna eskainiko ditu. Beste alde batetik, Lekeitioko Musika Bandak inprobisazioan eta ezustekoan oinarritutako dantza eta musika jam session-a antolatuko du EKHI-a taldeagaz batera, eta Euskal Zine Bilera jaialdiak Kalekaz Blai atalaren barne ikus-entzunezko sorkuntza garaikideagaz lotutako ekintzak eskainiko ditu.
