Udako Kalera martxa Lea-Artibai eta Mutrikutik igaroko da uztailean
Presoen eskubideen defentsan antolatutako beste hainbat ekimenen artean, Ezker abertzalearen Kalera, kalera dinamikak udako kalera martxa egingo du uztailean. Bizkaia, Gipuzkoa eta Nafarroako hainbat herritatik igaroko den martxa Gernika-Lumon hasiko dute eta Lakuntzan (Nafarroa) amaitu. Presoen eskubideen aldeko aldarriagaz batera, jaia ere uztartuko dute, kultur ekitaldi ezberdinen bitartez.
Preso, iheslari eta deportatuen aldeko ibilbideak zortzi etapa izango ditu. Gernikatik Bermeorako bidea egin beharko dute parte hartzen dutenek uztailaren 20an, eta Bermeotik Lekeitiora abiatuko dira hurrengo egunean. Uztailaren 22an Lea-Artibain zehar ibiliko dira, eta Ondarroatik hasita, Mutriku eta Debatik igaroko dira hurrengo egunean. Seigarren eta zazpigarren etapetan, Getaritik Ibarrarako bidea izango dute egiteke.
Izena ematea beharrezkoa. Martxan parte hartu nahi duenak izena eman beharko du uztailaren 10a orduko ohiko lekuetan; horietan egongo baitira ibilbide osorako bonoak (60 euro), eguneko sarrerak (15 euro) eta Etxarriko bazkarirako txartelak (10 eurotan).
Antolatzaileek martxan parte hartzera deitu dituzte herritarrak, eta otorduak eta lotarako lekuak bermatuko dituztela adierazi dute.
Zarauzko hondartzan aurkeztu zuten udako kalera martxa. Argazkia: Topatu.
Etapak:
- 1. etapa: Uztailak 20, eguena. Gernika-Busturia-Bermeo (15 km).
- 2. etapa: Uztailak 21, barikua. Bermeo-Ea-Lekeitio (24 km).
- 3. etapa: Uztailak 22, zapatua. Lekeitio-Ondarroa (14 km).
- 4. etapa: Uztailak 23, domeka. Ondarroa-Mutriku-Deba (11 km).
- 5. etapa: Uztailak 24, astelehena. Deba-Zumaia-Getaria (24 km, Zumaiaraino mendiz).
- 6. etapa: Uztailak 25, martitzena. Getaria-Zarautz-Hernani (13 km).
- 7. etapa: Uztailak 26, eguaztena. Hernani-Anoeta-Ibarra (20 km).
- 8. etapa: Uztailak 27, eguena. Ibarra-Etxarri Aranatz-Lakuntza (16 km).
