San Joan Eguna kolore bizi, usain goxo eta erakustaldiz gainezka etorri da

Aulesti,Markina-Xemein,Ondarroa,Ziortza-Bolibar

2017/06/24

Herriko jai nagusietan murgilduta daude Aulestiko eta Ziortza-Bolibarko herritarrak. Jaien hirugarren eguna dute gaurkoa [ekainak 24] Aulestin, eta bigarrena Ziortza-Bolibarren. Markina-Xemeingo Amallo auzoan eta Ondarroako Gorozika auzoan ere ez da girorik falta izan. Urte oparoa izan dadin iaz egindakoak atzo sutara bota eta gero, ohi legez, Sobra Txapelketa egin dute meza ostean Aulestin; hamazortzigarrena izan da. 55 sobra aurkeztu dituzte guztira; denetarikoak: txikiak bezain politak –batzuk umeek gurasoen laguntzagaz egindakoak– eta handiak bezain dotoreak, osagairik falta izan ez dutenak. Epaimahaikideak hiru, azken urteetan eskarmentua daukatenak hirurak: Maribi Unamuno, Karmele Goitiandia eta Antxone Aranzeta. Hiru bigarren sari eta hiru lehen sari banatu dituzte: bigarren sarituak Noelia Arakistain, Lurdes Erezuma eta Eugenio Jaio izan dira; lehen saria jaso dutenak, berriz, Antoni Zelaia, Izaro Aranburu eta Juanita Urkaregi.

[zuzenean ARGAZKI GALERIA ikusi]

Bien bitartean, paellak prestatzen aridu dira kuadrillak, nork bere lokalean edota elizako atari eta inguruetan: 11:00etarako hasi dira prestaketetan goiztiarrenak. Giro ederrean prestatu dute ondoren herri bazkarian dastatzeko jatekoa. 29. Ipuin Topaketaren sari banaketa ekitaldia ere egin da, eta zozketarik ez da falta izan. Euskal preso eta iheslariak gogoan izanda, zozketa txartelak eskuratu ahal izan dituzte plazan elkartutakoek. Zenbaki saritua 5288 zenbakia izan da, eta ordezkoa 5275.

Ziortza-Bolibarko frontoian paellak prestatzen eta lanean ibili direnak.

Txistu doinuek girotu dute goiz partea Ziortza-Bolibarren. Mezatan bildu diren askok gaurko propio prestatutako sobrak eraman dituzte eurekin, herriari kolorea emanez. Etxeetako balkoi batzuetan ere ez dira falta izan, antzinako usadioari jarraituz. Bien bitartean, bost paella eder prestatzen aritu dira herriko taldeak frontoian. 13:45erako prest zeuden guztiak. 150 lagun elkartu dira frontoian paella janagaz gozatzeko. Eta bazkalostea girotzeko, herri olinpiadak egin dituzte plazan: abestiak taldeka, txapel jaurtiketa…

[zuzenean ARGAZKI GALERIA ikusi]

Auzoetako jaiak. Amallon, gazteen arteko herri kirol eta aulki dantzagaz gozatu dute mezaren ostean. Herri bazkaria, umeen jolasak eta zaldi eta idi probak eduki dituze aukeran arratsaldean, eta gauean Anariren kontzertuan bilduko dira. Joxparen erromeriak itxiko du San Joan Eguneko egitaraua. Ondarroako Gorozika auzoan, Amets Arzallus eta Anjel Mari Peñagarikanoren bertso saio umoretsua izan dute goiz partean, eta arratsaldean, txikien gozamenerako, Irrien Lagunak izan dira auzoan; aurpegiak margotuta ala margotu barik, Martin Bertso eta Tiritatxogaz jolasean aritu dira txikienak. Binakako Urrezko Aizkora errebentxan bildu dira, berriz, Aitzol Atutxa-Ugaitz Mugertza/Xabier Orbegozo eta Joseba Otaegi. Iñaxio Perurenaren erakustaldia izan da desafio artean. Ibiriren animaliekin agurtu dute eguna.

Erlazionatutako edukiaARGAZKI GALERIA San Joan jaiak: Aulesti, Ziortza-Bolibar, Gorozika eta Amallo