Lekeitioko Udalak indarkeria matxistaren kontrako jaima ipiniko du
Iaz bezala, aurtengo Antzar egunean [irailak 5] ere Indarkeria matxistaren kontrako jaima aurkituko dute, udaletxe aurrean, lekeitiarrek zein jaira batzen diren bisitariek. 12:00etatik 15:00etara egongo da zabalik.
Lekeitioko Udalak adierazi duenez, berdintasunaren aldeko jai giroarekin bat eginez, eta indarkeria matxistaren aurkakotasun osoa erakutsiaz, Euskadiko Gazteriaren Kontseiluak abian jarritako (EGK) #GukEzetz kanpainaren hedapena ere egingo dute. Hori dela eta, Antzar Egunean jarriko duten jaima informatiboan, indarkeria matxistari aurre egiteko baliabideez eta Lekeitioko Udalak sortutako beste materialez gain (txapak, antzar zapiak,..) EGKren kanpainaren mezua hedatzen duten eskumuturrekoak ere eskuratu ahalko dira. “Gunean, gainera, eraso sexisten kontrako mezuak dituen photocall-a ere egongo da nahi duenak argazkiak ateratzeko”.
Jaietan indarkeria sexistak saihesteko beste neurri batzuk ere hartu ditu udalak. Alde batetik, joan den urtean abian jarri zuten Antzar eguneko autobabes planean herritar eta bisitarien segurtasuna bermatzen duten eragileek (Osakidetza, SOS DEIAK, Gurutz Gorria, babes zibila, Ertzaintza, Udaltzaingoa,…) eraso sexistaren bat gertatuz gero zelan jokatu behar duten zehazten dela gogora ekarri dute.
Bestalde, Emakumea eta Berdintasun Batzordeak taberna eta barraketako giroa alaitzeko Spotify-ko aplikazioan Beldur Barik playlist-a daukatela jakinarazi diete tabernari eta ferialariei, “bertan aurkituko duten abesti ez sexisten zerrenda erabiltzeko”. Tabernariei gutun bat ere bidali diete, tabernan eraso sexistaren bat gertatuz gero, zelan jokatu behar duten jakinarazteko.
Jaietako egitarauan ere emakumeen kontrako indarkeriaren inguruko oharrak eta informazioa zabaldu ditu udalak, eta udaletxeko balkoian ere Gora ligoteo Sanoa, eraso sexistarik ez leloa daraman pankarta jarri dute udaltzainen zein sos deiak-en telefono zenbakiarekin. “Emakumeen kontrako indarkeria denon ardura da, beraz edozein erasoren aurrean aktiboa izan behar da gure jarrera”, azpimarratu dute.
Indarkeria Matxista gainditzen laguntzeko materiala sortu du Lekeitioko Udalak. Argazkia: Lekeitioko Udala
