Bi eguneko egitarau betearekin datoz Mutrikuko Samikolla auzoko jaiak

Mikel Santiso

2017/09/05

Zapatuan eta domekan ez da aspertzeko aukerarik egongo Mutrikuko Samikolla auzoan. Auzotarrek San Nikolas bezpera eta San Nikolas eguna bera ospatzeko hainbat ekintza antolatu dituzte. Galbaixo jaien aurreko asteburua izanik, gainera, Arno Trail mendi lasterketa ere jokatuko da. Antolatzaileek nabarmendu dutenez, aurten ez dute bat egingo herriguneko eta auzoko ekintzek, Mutrikuko Udalarekin akordio batera iritsi ostean. Jaiari hasiera ofiziala txupinarekin emango badiete ere, arinago erraldoi eta buruhandien konpartsarekin joango dira herrigunetik Samikollara, kalejiran. Zapatuan izango da hori, 11:00etan. 2010ean hasi ziren auzoko jaiak ospatzen berriz ere, eta ordutik ona, auzotarrez gain, herritar ugari joaten dira bertako jaiez gozatzera. Kalejira heltzen denean, haurrentzako puzgarriak ere zabalduko dituzte. 14:30etan, auzo bazkaria egingo dute, eta atzetik, 18:00etan, Ibiriko abereak egongo dira.

Iaz Samikollan egindako auzo bazkaria.

Musika. Musikak ere edukiko du lekua Samikollan, eta aurten zapatua San Nikolas bezpera izanda giro bikaina egoteko osagai guztiak jarri ditu antolakuntzak. 20:00etan bertso saioa egingo dute Igor Elortza eta Jon Maia bertsolariek. 23:00etan Etsaiakeroak taldearen kontzertua egongo da, eta ondoren Ezten Giro taldearen erromeria. San Nikolas eguna domekan izango da aurten, eta ospakizunak mezagaz hasiko dituzte, urtero legez. Ordu berean, kirol probei ere hasiera emango diete. Miruaitz frontoian Xisterako finalerdietako partiduak jokatuko dituzte, eta Galbaixoko ermitatik abiatuta VIII. Arno Trail mendi lasterketa egongo da. Aurten, gainera, ibilbide berria edukiko du. Amaieran, sari banaketa egingo dute. Arratsaldean, 20. Euskal Artzai Txakur Lehiaketa jokatuko dute Euskal Herriko hainbat lekutatik etorritako parte hartzaileek. Tartean egongo da Jabier Zubiaurre mutrikuarra. Samikolla auzoko festei amaiera emateko, Josu Arrizabalaga eta Eugenio Gisasola trikitilariek girotuko dute iluntzea. EGITARAUA Irailak 9, zapatua

11:00. Kalejira erraldoi eta buruhandien konpartsarekin, Goiko Plazatik hasita.
Ondoren. Txupinazoa, brindisa eta puzgarrien irekiera.
14:30. Auzo bazkaria.
18:00. Ibiriko abereak.
20:00. Bertso saioa: Igor Elortza eta Jon Maia.
23:00. Kontzertua: Etsaiakeroak.
Ondoren. Erromeria: Ezten Giro taldea.

Irailak 10, domeka

11:00. Meza
Ondoren. Omenaldia, salda eta txorizoa.
11:00. Xistera zirkuituko finalaurrekoak, Miruaitz frontoian.
11:00. VIII. Arno Trail mendi lasterketa, Galbaixoko ermitatik hasita.
12:30. Sari banaketa.
17:30. XX. Euskal Artzai Txakur Txapelketa.
Ondoren. Josu Arrizabalaga eta Eugenio Gisasola trikitilariak.