Ispasterko mendi martxan aurrez izena emateko epea datorren astean amaitzen da
Irailaren 11 (astelehena) da aldez aurretik izena emateko azken eguna, Internetez. Irailaren 17an (domeka) egingo dute mendi martxa.
Ispasterko Udalak seigarrenez antolatu du proba, eta 500 parte hartzailetan jarri dute muga.
Aldez aurretik zein egunean bertan izena eman, prezio bera dago. Hain zuzen, 14 urtera artekoek 10 euro ordaindu behar dituzte, eta gainontzekoek 15 euro.
Hala ere, Internet bidez aurrez izena ematen dutenek bakarrik jasoko dute kamiseta, eta egunean bertan izena ematen dutenek, ostera, opari bana jasoko dute. Bestalde, parte hartzaile guztien artean zenbait opari zozketatuko dituzte: pultsometro bat Otoio Kirolak-en eskutik, fisioterapia saio bat Maite Fisioterapian, bi pertsonentzako bazkaria Areitz-Bi jatetxean eta bi pertsonentzako bazkaria Herriko Tabernan.
Egunean bertan, proba bakoitza hasi baino ordu erdi lehenago izena eman ahalko da.
Aurten ere BTT eta lasterketa. Hasierako urteetan mendi martxa egin ostean, iaz lehenengoz martxagaz batera, mendi bizikleta martxa eta mendi lasterketa antolatu zituzten. Hala, aurten ere lau proba egiteko aukera eskaini dute: Martxa luzea, BTT martxa, lasterketa eta martxa laburra.
Ibilaldi luzea eta lasterketa 23 kilometrokoak dira, eta mendi bizikletako ibilbidea da luzeena, 28 kilometrokoa, hain zuzen. Bestalde, umeekin egiteko aproposa den ibilaldiak 10 kilometro ditu.
Mendi martxa luzeko partaideak izango dira goiztiarrenak; 08:30ean irtengo dira plazatik. 09:30ean, berriz, BTT probako txirrindularien txanda izango da, eta 10:00etan aterako dira korrikalariak. Azkenik, ibilbide laburreko parte hartzaileak 10:30etan dute ordua.
Ibilbidean zehar hornidura guneak egongo dira; martxa laburreko partaideentzat bi anoa postu jarriko dituzte, eta beste hiru probetakoentzat lau hornidura gune egongo dira.
Ispasterko VI. Mendi Martxari buruzko informazioa ispasterkomendimartxak.blogspot.com.es eta www.ispaster.net atarietan dago.
