Ondarroako Zubi Zahar herri ikastolak bere 50.urteurrenaren aurkezpen ekitaldia egin du

Mikel Santiso

2017/09/08

Gaur goizean [irailak 8] eman diote hasiera 50. urteurrena ospatzeko ekitaldiei, aurkezpen saioagaz. Ikasturte hasierako lehen egunarekin batera, ikasle ohi, guraso, irakasle, ikasle eta senideak batu dira ikastolako jolastokian. Pello Arrizabalaga irakasleak egin ditu aurkezle lanak, eta bertaratutako guztien aurrean hasiera eman dio ospakizunari. Ostean, Joxe Mari Urteaga irakasle eta idazleak eta Izaro Beitia ikasleak lehenengoak idatzitako testu bat irakurri dute, Zubi Zahar herri ikastola bere hastapenetatik gaur eguneraino nola iritsi den azaltzeko.

[zuzenean ARGAZKI GALERIA ikusi]

Oholetik ahalera. Lelo hori aukeratu du ikastolak bere 50. urteurrena ospatzeko. Bertako ordezkariek azaldu dutenez ikastola Antzo Solon zegoenean ikasleek mahai gisa erabiltzen zituzten oholetan eta ordutik gaur eguneraino egin ahal izan duten guztiaren arteko hitz joko bat da.

Ikasleak kamiseta arrosa soinean joan dira gaur ikastolara.

Aurkezpenaren ostean, Andoni Gartzia ikastolako ikasle ohi eta disenatzailea denak sortutako 50.urteurreneko irudia egin dute bertaratutakoek. Honen ondoren, ‘zorionak zuri’ kanta abestu diote ikastolari, eta globo eta karamelu zaparradarekin amaitutzat eman dute aurkezpen ekitaldia. Aitortza berezia egin nahi izan diete ikastolak bere lehen urratsak ematea ahalbidetu zutenei, eta eskertza modura tarta ere ekarri dute.

[zuzenean ARGAZKI GALERIA ikusi]

Azaldu dutenez, hilabetero antolatuko dute kirol edo kultur ekintzaren bat, urteurreneko ospakizunak urte guztian luzatzeko. Azaroan, esaterako, herri krosa antolatuko dute, eta geroago etorriko dira erakusketak, kontzertuak, antzerkiak eta abar luze bat. Urteurreneko ospakizunei 2018ko ikastola egunarekin batera emango zaie amaiera, ekainaren 16an.

Zubi Zahar herri ikastolaren 50.urteurrenaren aurkezpena

Erlazionatutako edukiaARGAZKI GALERIA: Zubi Zahar herri ikastolaren 50. urteurrenaren aurkezpen ekitaldia