Urriaren 13an eta 14an lehiatuko dute Gernika-Lumoko Rallya
Parte hartu gura duten pilotuek urriaren 6ra arte daukate izena emateko epea. Ibilbideak 270 kilometro izango dituGernika-Lumoko Rallya urriaren 13an eta 14an lehiatuko da; aurtengoa 24.a izango da. Izena emateko epea zabalik dago dagoeneko, eta lehiat...
Parte hartu gura duten pilotuek urriaren 6ra arte daukate izena emateko epea. Ibilbideak 270 kilometro izango ditu
Gernika-Lumoko Rallya urriaren 13an eta 14an lehiatuko da; aurtengoa 24.a izango da. Izena emateko epea zabalik dago dagoeneko, eta lehiatu gura duten pilotuek urriaren 6a dute horretarako azken eguna (22:00ak arte).Izen emate orriak www.gernikaracing.com webgunean daude eskuragarri, eta ordainketa Kutxabankeko hurrengo kontu korronte zenbakian egin beharko da: ES57 2095 0321 70 9107460246 (Gernika Racing Elkartea). Izena eman dutenen zerrenda urriaren 11n argitaratuko dute, 22:00etan, Gernika Racing Elkartearen webgunean.
270,80 kilometroko ibilbidea izango du; eta horietatik 98,80 kilometro erlojupekoak izango dira. Hain zuzen, erlojupeko bederatzi tarte izango ditu probak. Parte hartzaileek tarte horiek probatzeko aukera izango dute urriaren 8an.
Proba, urriaren 14an
Aurten ere Pasealekuan ipiniko dute parke itxia, eta sari banaketa ekitaldia ere han egingo dute urriaren 14an. Egiaztatze teknikoak Adolfo Urioste kalean egingo dituzte urriaren 13an, eta administratiboak Foruen plazan dagoen Elai-Alai aretoan. Egun horretan 23:00etan argitaratuko du Gernika Racing Elkarteak hurrengo eguneko proban lehiatzeko baldintzak betetzen dituztenen zerrenda.
Urriaren 14an 08:00etan emango diote hasiera lasterketari; ordu horretan aterako da lehenengo autoa Pasealekutik. Egun osoko proba izango da, eta autoek Mestikabaso plazan izango dute asistentzia gunea.
Gernika-Lumon geratu zen iaz txapela. Izan ere, Ivan Muñoz gernikarra eta haren kopilotu Hodei Madariaga ajangiztarra nagusitu ziren sailkapenean. Barikuko Lumoko igoeran denborarik onena egin eta hurrengo eguneko lasterketan ere lehen postuari eustea lortu zuten.
