Asier Illarramendi mutrikuarrak debut ofiziala egin du Espainiako selekzioarekin
Mutrikuarrak Israelen aurkako partiduan egin zuen debut ofiziala, astelehenean, 2018ko Errusiako Munduko Koparako sailkapen partiduan. Lehenago ere jokatu zuen neurketa bat Illarramendik, Kolonbiaren aurka, baina lagunarteko partidua izan zen.
Baina debut ofizialaz gain, gola ere sartu zuen Illarramendik astelehenean. Partidua amaitzeko gutxi falta zela, area ertzetik jaurtiketa eder baten ostean Espainiari garaipena eta 3 puntuak eman zizkion gola sartu zuen; 0-1 irabazi zuten.
2018ko Errusiako Munduko Kopara joateko aukerak dauzka mutrikuarrak, baina partidua amaitu zenean aitortu zuen bezala badaki zaila izango dela: “jokalari asko gaude Errusiara joateko aukerekin, eta zaila izango den arren 23 aukeratuen artean egotea horretan saiatuko naiz”.
Kepa Arrizabalaga
Atezain ondarrutarraren debutak itxaron egin beharko du. Espainiako selekzioa Israeleko partidua jokatu baino lehen sailkatuta egoteak, Arrizabalagari debuta egiteko ateak zabaldu zizkion, baina Julen Lopetegi hautatzaileak Reina atezaina zelairatzea erabaki zuen. Kepa izan da bi neurketetan minutu bakar bat ere jokatu ez duen bi jokalarietako bat.
Illarramendi Israelen aurkako gola ospatzen, bere taldekideekin. Argazkia: @illarra4
