555 bat pertsonak aurrez izena eman dute Aulestiko XII. Ermitarik Ermita mendi martxan
Zapatuan (urriak 21) egingo dute mendi martxa, eta aurten martxaren egunean bertan izena emateko aukera eman dute. Zapatuan izena ematen dutenek baina, ez dute kamiseta oroigarria jasotzea ziurtatuta.
Hain zuzen, urtero moduan mendi martxa amaieran kamiseta oroigarriak banatuko dituzte plazan, eta kopaua egongo da parte hartzaile guztientzat. Kopauan parte hartzeko eskumuturrekoa erakustea beharrezkoa izango da.
Era berean, urtero legez, mendi martxa hasi aurretik, tabernak zabalik egongo dira parte hartzaileek gosaldu ahal izateko.
25 kilometro izango ditu ibilbide osoak, eta laburrak, ostera, 10 kilometro. Halaber, 29 kilometroko ibilbidea ere prestatu dute. Baina, jakitera eman dutenez, eguraldiaren arabera erabakiko dute Ilunzarrerainoko ibilbide hori egin ala ez.
08:00etan herriko plazatik irtengo dira ibilbide osoko zein bereziko parte hartzaileak. 25 kilometroko martxa bost ordu eta erdian egin ohi dute. Berezia burutzeko, berriz, ordubete bat gehiago behar da.
Bestalde, 10 kilometroko ibilaldia egiteko 10:30ean irtengo dira parketik. Hiru bat ordutan amaitzeko ibilbidea denez, umeekin doazen familientzat aproposa da.
Ibilbidean hiru hornidura gune izango dituzte indarberritzeko: Urregaraiko zelaian, Garatxagan eta Lekerikan.
Beste alde batetik, martxa amaitzean gura duenak dutxatzeko aukera izango du.
Antolatzaileek pare bat zehaztapen egin dituzte: mendi martxara ezin da txakurrik eroan, eta ibilbidean zehar zein hornidura guneetan hondakinak zakarrontzietara botatzeko eskatu dute.
IBILBIDEAK:
- Osoa (25km). Aulestiko plaza-San Anton-Goierri-Urregarai-Malats-Zubero-Urriola-Murelaga-Garatxaga-Lekerika-Narea-Aulestiko plaza.
- Berezia (29km). Aulestiko plaza-San Anton-Goierri-Urregarai-Malats-Zubero-Urriola-Murelaga-Garatxaga-Lekerika-Ilunzar-Narea-Aulestiko plaza.
- Laburra (10km). Parkea-Murelaga-Garatxaga-Lekerika-Narea-Aulestiko plaza.
