Hezkidetza egitasmoaren aurkezpena egingo du Ondarroako Udalak
Bihar [urriak 27] egingo dute proiektuaren aurkezpen ekitaldia, 18:00etan Etxelilan. Egitasmoaren aurkezpenagaz batera bideoa ere aurkeztuko dute.
Ondarroako Udalak duela urte batzuk jarri zuen martxan Hezkidetza egitasmoa, jendartearen eraldakuntzarako bitarteko bezala. “Pertsonen garapenerako bitarteko askatzaile bilakatu behar da hezkidetza” antolatzaileen ustez, “pertsona aske eta integralak heziz eta sexuen arteko aukera berdintsuen alde eginez”.
Hori dela eta, joan den urtean emandako urratsak aztertu eta aurrera begira eman beharreko urratsak definitzeko, proiektuaren azterketa bat egin da Urtxintxa eskolagaz batera. Azterketa honen bitartez, besteak beste, proiektu honen esperientzia herriratzeko tresnak sortu dituzte.
Proiektuak ikasleentzako, irakasleentzako, familientzako eta jantokietako hezitzaileentzako eta eskolaz kanpoko hezitzaileentzako egongo dira zuzenduta. Ikasleentzako edukiak mailaka egongo dira banatuta. Besteak beste indarkeria, harreman afektibo sexualak, bizikidetza, sare sozialak, autodefentsa feminista eta maskulinitate ereduak landuko dira.
Hezkidetza egitasmoak herriko hezkuntza esparruetan berdintasunean oinarritutako hezkuntza bultzatzea du helburu.
Ondarroako institutuko ikasle batzuk. Argazkia: Ondarroa BHI
