Mutriku Futbol Taldeko neskek Amaikak Baten aurka jokatuko dute

Mikel Santiso

2017/10/26

Mutriku Futbol Taldeko nesken taldea. Argazkia: Mutriku FT

Leire Fernandez ondarrutarrak entrenatutako neskek partidu berezia jokatuko dute zapatuan. Mutriku eta Amaikak Baten arteko lehiak beti izan ohi dira bereziak, bi herrien arteko gertutasunarengatik. Gainera, sailkapenean hiru puntuk baino ez ditu aldentzen bi taldeak; Amaikak Batek lau ditu eta Mutrikuk bakarra. Azken asteburuan ez zuten jokatu mutrikuarrek atsedena egokitu zitzaielako. Urolaren aurka jokatu zuten azken partidua eta lortu zuten berdinketari esker daukate sailkapenean puntu hori. Zapatuan 18:30ean gogo biziz aterako dira Errota Zar futbol zelaira. Giro polita espero da eta mutrikuarrak sailkapenean debarren pare jartzeko itxaropentsu daude. Mutriku Futbol Taldeko mutilak izango dira jokatzen lehenak. 16:15ean Aretxabaleta izango da bisitari San Migelen. Txaparroren mutilak pozik daude Ordizian lortutako azken garaipenarekin, eta kanpoko 3 puntuei etxean beste hainbeste batzen saiatuko dira.

Jon Linder Mutriku Futbol Taldeko jokalaria, Ordiziaren aurkako partiduan. Argazkia: Jesus Mari Erauzkin

Aurrerak 17:00etan jokatuko du Zaldupen San Pedroren aurka. Sestaoarrak iaz play-offa jokatuta daude, eta aurten ere talde gogorra direla erakutsi dute. Ibon Lopezen mutilak zaletuen aurrean garaipena lortzen saiatuko dira, iragan astean etxetik kanpoko lehen puntuak lortu ostean. 18:00etan jokatuko duena Artibai Futbol Taldea izango da. Bilboko El Fango kiroldegian Urretxindorraren aurka jokatuko dute, ligako lehen garaipena lortzeko itxaropenarekin. Domekan berriz Lekeitiok eta Berriatukok jokatuko dute. Lekeitiarrak domeka goizean arituko dira Bilboko La Roseta zelaian, Iturrigorriren aurka, 11:30ean. Berriatuarrak aldiz, iragan asteko lehen garaipena lortu eta gero, prest daude Montefuerteri aurre egiteko domekan 17:00etan Arrigorriagan.