Abenduaren 9ko Pariseko ekitaldiaren aurkezpenak egingo dituzte Ondarroan eta Mutrikun
Parisen antolatu duten bakearen aldeko mobilizaziora joateko batzarrak egingo dituzte Ondarroan (zapatuan 13:00etan, Goiko Zinean) eta Mutrikun (martitzenean, 19:00etan, Zabielen).
Bakearen artisauek antolatu dute mobilizazioa Eta orain presoak lelopean. Artisauek presoen aterabide orokorrean berehalako eta urgentziazko erabakiak eskatzen dituzte, “salbuespen egoeratik ateratzeko”. Abenduaren 9ko mobilizazioekin Foro Sozialak, hainbat eragilek eta norbanako ezagunek bat egin dute “bigarren Luhuso izango denarekin”.
Antolatzaileek jakitera eman dutenez autobusak egongo dira Parisera joateko herri guztietatik. Mobilizaziori buruzko xehetasunak jasotzeko webgune bat dago martxan.
Bakearen artisauek nabarmendu dutenez, “jendarte zibilaren aktibazioa eta mobilizazioak ezinbestezkoa izan dira armagabetzea egin ahal izateko”. Eta orain, identifikatuta dituzten hiru alorrak bideratzeko ezinbestekoak izango direla iritzita, bide berdina erabiltzea nahi dute: presoak, biktimak eta elkarbizitza.
Abenduaren 9ko Pariseko mobilizaziora deitzeko agerraldia. Argazkia: Steilas
