Dantza ikastaroa eskainiko dute Ondarroako Etxelilan
Dantzatu, konektatu eta elkarrekin haziz izeneko ikastaroa eskainiko du Naroa Argoitia Iñurrita irakasleak Etxelilan. Argoitia dantza primaleko irakaslea eta coaching aurreratuan diplomatua da.
Ikastaroan, jabekuntza dantzaren bidez landuko dute. Helburua, “barruak askatu eta elkarrekin gozatzeko” emakumeentzako txoko bat sortzea dela adierazi dute antolatzaileek. Dantzaren bitartez, barne munduaz konektatu eta bakoitzaren gaitasunak berrindartzen saiatuko dira. Hitzaren bidez berriz, bizipenak elkarbanatuko dituzte, elkarrekin ikasi eta haziz. Elkar zaintzean oinarritutako emakume espazio bat sortzeko proposamena da.
Ikastaroak aldaketak eduki ditu hasierako datetatik. Egun berriak azaroaren 12 eta 26 eta abenduaren 10 eta 23 dira. 10:30ean hasiko dira saioak eta 13:30ean amaitu.
Antolatzaileek esan dutenez ikastaroan parte hartzeko aurretik eman behar da izena. Horretarako Etxelilako 94 613 40 08 telefono zenbakira edo Ondarroako Udaleko Berdintasun Sailera deitu behar da, 94 683 3667 telefonora. Bestela, mezu bat bidali behar da etxelila@ondarroa.eus edo emakume@ondarroa.eus helbide elektronikora.
Argoitiak emandako ikastaro bat. Argazkia: Busturialdeko Hitza
