Ingurumenarekin lotutako jarduerak egiteko hitzarmena sinatuko dute Jaurlaritzak eta Geoparkea kudeatzeko elkarteak
Gobernu Kontseiluak onartu egin du Eusko Jaurlaritzako Ingurumen, Lurralde Plangintza eta Etxebizitza Sailak Euskal Kostaldeko Geoparkea Kudeatzeko Elkartea den Geogarapenekin hitzarmena sinatzea.
Hitzarmenaren xedea legegintzaldi honetan Geoparkea osatzen duten hiru herrietan (Mutriku, Deba eta Zumaia) ingurumenarekin lotutako jarduerak egitea da. Sailak 280.000 euro bideratuko ditu 2020. urtera arte; 70.000 euro urteko.
Euskal Kostaldeko Geoparkea. Argazkia: Geoparkea.
Jaurlaritzak esan duenez, “hiru herri horiek flyscha dute erakargarritasun nagusia”, eta horregatik diru hori hiru herrien eremuetan dagoen espazioa kontserbatzeko eta bertan sustapen jarduerak bultzatzeko eta garatzeko erabiliko da. Jarduerak 2020 Geodibertsitatearen Estrategia deitutakoaren barruan eta 2030 Euskadiko Biodibertsitatearen Estrategia barruan daude kokaturik. Estrategia hauek Euskal Kostaldeko Geoparkean geodibertsitatea kontserbatzeko, ondare geologikoaren erabilera jasangarria sustatzeko eta ekosistema integratuak zaharberritzeko eta euren balioa nabarmentzeko diseinatu ziren.
