Gabonetarako janari eta opari bilketa bereziak egiten ari dira Ondarroan
Zaldupe eskolak esaterako, herritar guztiei zabalik dagoen janari bilketa hasi du aste honetan: «elkartasun bideak landuz». Helburua, gizartearen gehiengoarentzat data esanguratsuak diren Eguberrietan inoren mahaian jatekorik ez faltatzea da. Horretarako abenduaren 19ra arte Zaldupe eskolako sarreran jarri duten txoko berezian elikagaiak utzi ahal izango dituzte herritarrek. Zaldupetik jakitera eman dutenez, batutako elikagai guztiak Danonartin elkartera bideratuko dira. Hauek arduratuko dira gero bildutakoa beraiek daukaten elikagai bankura batzeaz eta banaketa egiteaz.
Bizkaiko Elikagai Bankuko presidente Miguel Angel Fernandinok prentsaurrean esan zuenez, aurtengo kanpaina berezian 930.000 kilo janari batu dira, «iaz baino %3 gutxiago». Kopuru «onargarria» dela aitortu zuen arren, herritarrei laguntza ematen jarraitzeko eskaria luzatu zien.
Opariak ere bai. Baina jatekoak ez ezik, opariak ere batuko dituzte. Txomin Agirre ikastolako ikasleek Haur bat ere ez jostailurik gabe ekimena jarri dute martxan. Abenduaren 15era bitartean herritarrei jostailuak ikastolara eramateko eskaria egin diete, haur guztientzat opariak egon daitezen.
Janari bilketa bat.
