Mutilen Xistera zirkuituko finalerdiak jokatuko dira Mutrikun
Zapatuan jokatuko dira finalerdiak, 19:00etan, Miruaitz frontoian. Kiniela formatuan antolatzen diren lehen finalerdiak izango dira zapatukoak. Hiru bikote arituko dira helduetan eta beste hiru gazteetan. 25 tantora egingo dituzte kinielak eta maila bakoitzeko bi bikote irabazleek abenduaren 16an jokatuko den finalerako txartela lortuko dute.
Helduetan, Antxon Alberdi berriatuarrak eta Mikel Manzisidor mutrikuarrak osatuko dute bikote bat, Jon Ibarluzea markina-xemeindarrak Ibai Iturrino edukiko du lagun eta hirugarren bikotean Ekaitz Mendizabal mutrikuarraren bikotekidea Zugaitz Sallaberri izango da.
Gazte mailako finalerdia ere hiru bikotek jokatuko dute. Lehenengoan Aratz Mendizabal mutrikuarrak Eduardo Agirre edukiko du lagun, bigarrena Clement Garcia eta Hugo Ibar bidartearrek osatuko dute eta hirugarren bikotean Thomas Urrutiaren taldekidea nor izango den erabakitzeke dago. Maxime Berdoulayk Tolosako jaialdiko finala irabazten baldin badu bera izango da Urrutiaren bikotekidea, eta bestela Iñaki Egia markina-xemeindarragaz osatuko du bikotea.
Mutrikun jokatutako jardunaldi bat.
