Mutrikuko mutilek partidu berezia jokatuko dute Deban Amaikak Bat taldearen aurka
Beti izaten da berezia bi taldeen arteko partidua, ondoan dauden herriak izanda beti egoten baitira hiru puntu baino gehiago jokoan. Oraingoan, gainera, puntu bakar bateko aldeak banatzen ditu bi taldeak sailkapenean; 28 dituzte debarrek eta 27 mutrikuarrek. Neurketa zapatuan 16:30ean jokatuko da Errota-Zar futbol zelaian. Igor Elezgarai Txaparro mutrikuarren aulkira itzuliko da, bi astetan taldetik aldenduta egon eta gero.
Ordu berean jokatuko du Aurrerak ere. Zalla edukiko dute aurkari Ibon Lopezen mutilek Zaldupen. Azken partiduan etxean jasandako porrota ahazteko aukera bikaina dute ondarrutarrek sailkapeneko azkenaren aurka. Bigarren itzuliko lehen partidua izango da eta ondarrutarrak gogotsu daude ligako lehen partiduan Zallan jasandako porrota itzultzeko Enkarterrikoei.
Artibai Futbol Taldeak ere etxean jokatuko du asteburan. Zapatuan Basconia B atldea izango dute aurkari Bittor Lekunberriren mutilek, 17:00etan. Azken bi partiduetan puntu bakarra lortu dute markina-xemeindarrek, baina bigarren itzuliari ekiteko prest daude; jokalariak errekuperatu dituzte eta itzulia iragan astean Barroetako zalegoari eskaini ezin izan zioten garaipenagaz hasi nahi dute. Maila berean, Berriatuko Futbol Taldeak 18:00etan jokatuko du Urbietan, Gernika Sportingen aurka. Gernikarrak sailkapenaren erdialdean daude eta berriatuarrek beharrezkoak dituzte puntuak beheko postuetatik ateratzen saiatzeko.
Lekeitio Futbol Taldea izango da domekan jokatuko duen talde bakarra. Goizean jokatuko dute San Juan futbol zelaian, 11:00etan. Dinamo San Juan taldeak lekeitiarrek baino puntu bat gehiago du sailkapenean, igoera postuetako azkenak bezain beste hain zuzen, 32 puntu. Partidu garrantzitsua da lekeitiarrentzat, goiko postuetan sartzeko aukera emango baitio. Edozer gertatuta ere asko geratzen da oraindik eta aukera asko dauzka Lekeitiok goiko postuetan egoteko.
Neskak. Mutriku Futbol Taldeko neskek zapatuan jokatuko dute 16.00etan San Migel futbol zelaian. Kopa txapelketako hirugarren jardunaldia izango da Intxurreren aurka jokatuko dutena eta bigarren garaipena lortzen saiatuko dira. Iragan asteko partiduan 1-1 berdindu zuten Urolaren aurka Argiñe Ansorregiren golarekin eta oraindik neurketarik galdu gabe daudenez horrela jarraitzen saiatuko dira.
Jon Lejardi Aurrerako jokalaria Erandioren aurkako partiduan.
Mutriku Futbol Taldeko nesken taldea. Argazkia: Mutriku FT
