Elkarbizitza lantzeko proposamena aurkeztuko dute Mutrikun
Otsailaren 1ean, eguenean, egingo dute proposamenaren aurkezpena, 19:00etan Zabieleko hitzaldi aretoan. Mutrikun haur eta gazteekin lan egiten duten eskola eta kirol, kultur eta aisialdi taldeetako kideei zuzenduta dago batzarra.
Iazko ikasturtean hasi ziren elkartzen herriko hiru ikastetxeetako gurasoen ordezkariak, “beharrak eta kezkak partekatzeko”. Bilera horietan beharrizan batzuk ikusi ziren eta orduan erabaki zuten Mutrikuko Udalera jotzea, bertako ordezkariei ikusitako beharren eta asmoen berri emateko. Udaletxean egindako batzarretan ikusi zen elkarbizitzaren arazoa guztiena zela eta orduan erabaki zen gaia jorratzen hastea, eragiten duen esparrua oso zabala dela iritzita: etxea, eskola, aisialdia… . Eragile guztiak bat etorri ziren elkarbizitza lantzeko proposamen bateratu eta berdina egin behar zutela, beti ere “modu proaktibo eta pebentiboan”. Lehen urratsa hezkuntza arloko eragileen artean “elkarlanerako zubiak” eraikitzea da, eta herritarrei zertan ari diren azaltzea. Horren harira Paco Casconen hitzaldiak antolatzea erabaki dute udalarekin batera, berak daukan elkarbizitza eredua ezagutzeko eta aurrera begira zer egin erabakitzeko.
Elkarbizitza nola landu erabakitzeko orduan Paco Cascon irakaslearen ideia eta proposamenek Mutrikun landu nahi denarekin bat datozela iritzi dute eta Mutrikun elkarbizitza modu bateratuan lantzeko hitzaldiak eskainiko ditu Casconek. Kataluniarrak martxoaren 7an ikastetxeetako irakasleei zuzendutako hitzaldia emango du eta hurrengo egunean, ostera, gurasoei zuzendutakoa.
Eguenean aurkeztuko dute elkarbizitza plana Mutrikun.
