Lekeitio Futbol Taldeak lortu du bakarrik garaipena asteburuan
Mikel Badiolak entrenatutako mutilak igoera postuetatik puntu bakar batera kokatu dira zapatuan Galeari irabazi ostean. Endika Iza aurrelariak sartutako bi golei esker garaipenaren bidera bueltatu ziren ostera ere lekeitiarrak. Laugarrenak dira orain sailkapenean, Abanto bosgarrenagaz eta Indautxu seigarrenagaz 34 puntura berdinduta.
Berriatuko Futbol Taldearen partidua bertan behera geratu zen. Urretxindorrako jokalari batzek autoan Ibarra futbol zelaira iristear zeudela, zelaiko aparkalekura sartzekotan zirela, hain zuzen, istripua eduki zuten eta neurketa bertan behera uztea erabaki zuten. Berriatukoko arduradunek esan duenez, oraindik ez daukate zehaztuta partidua noiz jokatuko den.
Markina-Xemeingo Artibai Futbol Taldeak jipoia jaso zuen Mungiara egindako bisitan. 6-2 galdu zuten, eta Eñaut Gorosabelek eta Cheikh Colyk sartutako golek ez zuten markagailua apaintzeko baino balio izan. Merezitakoa baino gol gehiago jaso zituen Bittor Lekunberriren taldeak. 12. sailkatuak dira orain sailkapenean, jaitsiera postuetatik 5 puntura.
Aurrera Kirol Elkartea puntu bakar bategaz itzuli zen Etxebarritik. Sailkapeneko azken taldearen aurka zerbait gehiago merezi izan bazuten ere, ezin izan zuten garaipenik eskuratu. Bigarren zatian etxeko taldea aurreratu zen, eta 77. minutuan Ander Laka kapitainak faltaz zuzenean sartutako gol bati esker berdindu zuten ondarrutarrek. Bigarren golaren bila ere joan ziren, eta aukeraren bat ere eduki zuten arren, ezin izan zuten garaipena Ondarroara ekarri. Zazpigarrenak dira orain sailkapenean, 29 puntugaz, eta igoera jokatzeko play-off postua bost puntura dago orain.
Mutriku Futbol Taldeko mutilek gol askoko partidua jokatu zuten Gipuzkoako Ohorezko Mailako talde indartsuenetako baten aurka; 3-3 berdindu zuten Tolosaren kontra. Kanpokoak aurreratu ziren markagailuan 10. minutuan, eta Ion Landak berdindu zuen 15 minutu beranduago. Atsedenaldira joan baino lehen, tolosarrek berriz ere hartu zuten aurrea markagailuan, eta bigarren zatian hirugarrena ere sartu zuten. 1-3ko markagailuarekin mutrikuarrek aurrera egin zuten, eta partiduaren azken ordu laurdenean Markel Rodrigezek eta Aitor Esnalek neurketa berdintzea eta puntu bat San Migelen uztea lortu zuten. Igor Elezgarairen mutilak bederatzigarren sailkatuak dira orain.
Mutrikuko nesken taldeari atsedenaldia egokitu zitzaion kopa txapelketako iragan asteburuko jardunaldian.
Auto istripua 15:00ak aldera gertatu zen.
Aurreraren hamaikakoa Etxebarriren aurka. Argazkia: Leartigol
Erlazionatutako edukiaAutobus baten eta auto baten arteko istripua, Berriatuan
