Argazkilaritza estenopeiko ikastaroa emango dute Ondarroako Etxelilan
Argazkilaritza estenopeikoa izen bereko kamera baten erabileran oinarritzen den teknika da. Teknika horrek ez dauka argiaren errefrakzioan oinarritutako inolako sistema optikorik, eta horiek erabili gabe argazkiak egitea ahalbidetzen du. Kamera estenopeikoetan bitarteko horiek ez daudenez, estenopo izeneko orratz baten tamainako zulo batez baliatzen da irudia sortzeko.
Ikastaroaren antolatzaileek esan dute, bertaratzen direnek kamera estenopeikoak egiteko «kakao edo esne hautsaren antzerako lata bat» ekarri behar dutela:?«aluminiozkoa eta tapagaz; metal fina bada oraindik eta hobeto». «Birziklatutako ontziekin argazki kamera estenopeikoak eraikiko ditugu, hauek erabiliaz emakumezkoon ikuspuntua argazki formatuan plazaratzea helburu». Ikastaroa martxoaren 2an eta 3an egingo da. Lehenengo egunean 18:00etan hasi eta 21:00etara arte iraungo du ikastaroak eta bigarrenean, aldiz, 10:00etatik 17:00etara. Esan dute ordu beteko tartea egongo dela bazkaltzeko.
Lehen eguna proiektua zehaztu eta kamerak eraikitzera bideratuko da, eta bigarren egunean argazkiak atera eta errebelatuko dira, antolatzaileek esan dutenez. Ikastaroa emateaz arduratuko dena Nagore Legarreta Azelai izango da. Legarreta, besteren artean, argazkilaritza teknika primitiboen ikerlaria, argazkilaritza irakaslea eta argazki lan pertsonalak garatzen dituen argazkilaria da.
Izen ematea. Argazkialritza estenopeikoaren ikastaroan parte hartu ahal izateko aurretik eman behar da izena. Horretarako Etxelilako 94-613 40 08 telefono zenbakira martitzenetik barikura 16:30etik 20:30era bitartean, edo Ondarroako Udaleko Berdintasun Sailera deitu behar da, 94-683 36 67 telefonora, astelehenetik barikura 9:00etatik 14:00etara. Bestela, mezu bat bidali behar da etxelila@ondarroa.eus edo emakume@ondarroa.eus helbide elektronikora.
Nagore Legarreta argazkilaria. Argazkia: Anna Wu/Facebook
